..अन्यथा मका भरलेले ट्रॅक्टर घेऊन धडकणार तहसील कार्यालयात.. -देसाईगंज तालुक्यातील मका उत्पादक शेतकरी आक्रमक..

देसाईगंज(गडचिरोली):-देसाईगंज तालुक्यातील मका उत्पादक शेतकरी बांधवांनी मोठ्या प्रमाणात मका पिकाचे उत्पादन केले व उत्पादित केलेला माल शेतकरी आधारभुत खरेदी योजनेअंतर्गतच्या प्रक्रीयेनुसार ऑनलाइन नोंदणी करून काहींनी घरात तसेच परिस्थितीनुसार अंगणात साठवणूक करून ठेवला.मात्र, अद्यापही मका खरेदीची शासकीय केंद्रे सुरू न झाल्याने आज,मंगळवार १२ मे रोजी तालुक्यातील मका उत्पादक शेतकऱ्यांनी देसाईगंजच्या तहसीलदार प्रीती डुडुलकर यांना निवेदन सादर करून तात्काळ मका खरेदी केंद्रे सुरू करण्याची मागणी केली आहे.त्याचबरोबर,जर कां येत्या दोन दिवसांत मका खरेदी केंद्रे सुरू न झाल्यास मका भरलेले ट्रॅक्टर घेऊन तहसील कार्यालयावर धडक देण्यात येईल,असाही इशारा शेतकऱ्यांनी दिला आहे.

शेतकरी आधारभुत खरेदी योजनेअंतर्गत देसाईगंज तालुक्यातील अनेक शेतकऱ्यांनी मका विक्रीसाठी ऑनलाइन नोंदणी केली,पण महामंडळ खरेदीची चातक पक्ष्याप्रमाणे वाट पाहत बसलेल्या शेतकऱ्यांच्या पदरी निराशाच पडली आहे.शासनाच्या उदासीन धोरणामुळे मका खरेदी संदर्भात कोणतीही कार्यवाही दिसून येत नसल्यामुळे मका उत्पादक शेतकरी आर्थीक कोंडीत तसेच निसर्गचक्राच्या कचाट्यात सापडले आहेत.त्यामुळे, अवकाळी पावसाचा धोका तसेच ठरवुन दिलेल्या लक्षांक मर्यादेमुळे संपूर्ण शेतकऱ्यांचा माल खरेदी न होण्याची भिती शेतकऱ्यांच्या मनात घर करून बसल्याने आम्ही तुमच्या दालनात येऊन निवेदन सादर करीत आहोत, निवेदन सादर करूनही यावर ठोस निर्णय न झाल्यास येत्या दोन दिवसांत मका भरलेले ट्रॅक्टर घेऊन तहसील कार्यालयात दाखल होऊ,असे मका उत्पादक शेतकऱ्यांनी तहसीलदारांना दिलेल्या निवेदनात म्हटले आहे.

निवेदन सादरकरतेवेळी शेतकरी नितीन बन्सोड,रमेश कुथे,संदीप डोंगरवार,मनोज बन्सोड,संजय अवसरे, माणिक बन्सोड,प्रमोद कापगते,शांताबाई कापगते यांचेसह तालुक्यातील मका उत्पादक शेतकरी बांधव मोठ्या संख्येने उपस्थित होते.