अनियमित बसफेऱ्यांमुळे विद्यार्थ्यांचे शैक्षणिक नुकसान.. -विद्यार्थ्यांच्या व्यथा जाणून घेण्यासाठी आमदार रामदास मसराम बसस्थानकावर; अधिकाऱ्यांना धरले धारेवर..

कुरखेडा(गडचिरोली):-ग्रामीण भागातून शिक्षणासाठी तालुका मुख्यालयी येणाऱ्या विद्यार्थ्यांना एसटी महामंडळाच्या अनियमित बसफेऱ्यांमुळे मोठ्या मनस्तापाला सामोरे जावे लागत आहे.विद्यार्थ्यांची ही व्यथा जाणून घेण्यासाठी आमोरी विधानसभा क्षेत्राचे आमदार रामदास मसराम यांनी कुरखेडा बसस्थानकावर विद्यार्थ्यांची भेट घेतली.त्यांच्या समस्या जाणून घेत एसटी महामंडळाच्या ढिसाळ नियोजनाबद्दल संबंधित अधिकाऱ्यांना जाब विचारत तातडीने व्यवस्थेत सुधारणा करण्याचे निर्देश दिले.

• तीन-तीन तास बसची प्रतीक्षा; विद्यार्थ्यांचा संताप👇

ग्रामीण भागातील अनेक गावांमध्ये एसटी बस वेळेवर पोहोचत नसल्याने विद्यार्थ्यांना शाळा-महाविद्यालयांत वेळेत पोहोचता येत नाही.परिणामी,त्यांचे शैक्षणिक नुकसान होत आहे.बसच्या अनियमित फेऱ्यांमुळे अनेक विद्यार्थ्यांना नाइलाजाने खासगी वाहनांनी प्रवास करावा लागतो.त्यामुळे त्यांना आर्थिक भुर्दंडही सहन करावा लागतो.त्यातच,शाळा सुटल्यानंतर घरी परतण्यासाठी अनेक गावांतील विद्यार्थ्यांना बसस्थानकावर तब्बल तीन-तीन तास बसची वाट पाहत ताटकळत बसावे लागते. अंधार पडेपर्यंत बस येत नसल्याने विद्यार्थ्यांच्या सुरक्षिततेचाही प्रश्न निर्माण होत आहे.दरम्यान, विद्यार्थ्यांनी आपल्याला भेडसावणाऱ्या समस्यांचा पाढा आमदार रामदास मसराम यांच्यासमोर मांडला. विद्यार्थ्यांचा मनस्ताप जाणून घेतल्यानंतर आमदारांनी बसस्थानक प्रमुख गेडाम यांना अनियमित बसफेऱ्यांबाबत जाब विचारला.तसेच गडचिरोली आगारातील वरिष्ठ अधिकाऱ्यांशी विद्यार्थ्यांसमक्ष भ्रमणध्वनीवर संपर्क साधून परिस्थितीची जाणीव करून दिली.

• समन्वय बैठकीतून बसफेऱ्यांचे नियोजन करण्याचे निर्देश👇

विद्यार्थ्यांची गैरसोय दूर करण्यासाठी एसटी महामंडळाचे अधिकारी,गटशिक्षणाधिकारी आणि संबंधित शाळांचे मुख्याध्यापक यांची समन्वय बैठक घेऊन बसफेऱ्यांचे योग्य नियोजन करण्याचे निर्देश आमदार मसराम यांनी दिले.विद्यार्थ्यांच्या शैक्षणिक वेळापत्रकानुसार बससेवा उपलब्ध करून देत व्यवस्थेत तातडीने सुधारणा करण्याची ताकीदही त्यांनी दिली.

याप्रसंगी माजी पंचायत समिती सभापती गिरीधर तितराम,माजी सरपंच राम लांजेवार,युवक काँग्रेसचे अध्यक्ष प्रांजल धाबेकर,सादिक शेख,माजी सरपंच युवराज मरस्कोल्हे आणि लोकमतचे पत्रकार सिराज पठाण उपस्थित होते.