अज्ञात ट्रकची दुचाकीला धडक; तरुणाचा जागीच मृत्यू..

नागपूर :-मित्रासह दुचाकीने जात असतांना एका अज्ञात ट्रकने मागून दुचाकीला जोरदार धडक दिल्याने दुचाकीस्वार चालक तरुण जागीच ठार झाला,तर त्याच्या पाठीमागे बसलेला तरुण गंभीर जखमी झाल्याची घटना शनिवारच्या रात्री हिंगणा एमआयडीसी कॅम्पस परिसरात घडली.अपघातात जहीन कुरेशी वय २० वर्षे, रा.ता.लाखनी,जि.भंडारा हा तरुण जागीच ठार झाला.जहीन हा नागपूरच्या रायसोनी कॉलेजमध्ये अभियांत्रिकीच्या प्रथम वर्षाचा विद्यार्थी होता.जहीन हा एका मित्रासोबत जेवण केल्यानंतर रात्री उशिरा दुचाकीने त्याच्या वसतिगृहात जात होता.हिंगणा एमआयडीसी कॅम्पस परिसरात येताच एका अज्ञात ट्रकने त्यांच्या दुचाकीला मागून जोरदार धडक दिली.यात दोघेही खाली कोसळले.जहीनच्या डोक्याला गंभीर मार लागल्याने त्याचा घटनास्थळीच मृत्यू झाला,तर पाठीमागे बसलेला मित्र गंभीर जखमी झाला.जखमी विद्यार्थ्याला तात्काळ लता मंगेशकर हॉस्पिटलमध्ये दाखल करण्यात आले. सध्या त्याच्यावर उपचार सुरू आहेत.प्रकरणी पोलिसांनी अज्ञात ट्रक चालकाविरुद्ध गुन्हा दाखल करून ट्रक आणि चालकाचा शोध सुरू केला आहे.