अचानक वादळी वाऱ्यासह पावसाला सुरुवात होऊन अंगावर वीज कडाडली; तरुणाचा घटनास्थळीच मृत्यू..

कुरखेडा(गडचिरोली):-सध्या राज्याच्या विविध भागात उन आणि अवकाळी पावसाचा खेळ सुरू आहे. वातावरणात बदल आणि वादळी वाऱ्यासह पावसाला केव्हा सुरुवात होईल,हे सांगताच येत नाही.अश्याच प्रकारे गडचिरोली जिल्ह्याच्या कुरखेडा तालुक्यातील रामगड परिसरात अचानक वातावरणात बदल झाला आणि वादळी वाऱ्यासह पावसाला सुरुवात होऊन विजांचे कडकडाट सुरू झाले.दरम्यान, डेकोरेशनचे मजूर म्हणून काम करणाऱ्या एका १६ वर्षीय तरुणाच्या अंगावर वीज कोसळली.यात तरुणाचा दुर्दैवी मृत्यू झाल्याची घटना आज,रविवार ५ एप्रिल रोजी सकाळच्या सुमारास रामगड येथे घडली. दिशांत रेवाराम सतीमेश्राम वय १६ वर्षे,रा.मुरमाडी/पारडी,ता.लाखांदूर,जि.भंडारा असे मृत पावलेल्या तरुणाचे नाव आहे.

माहितीनुसार,कुरखेडा तालुक्याच्या रामगड येथील ईश्वर मेश्राम यांच्या मुलीच्या विवाहाचा कार्यक्रम असल्याने आज सकाळच्या सुमारास डेकोरेशनचे काम सुरू होते.अश्यातच दिशांत हा रामगड येथील गणेश डेकोरेशन मध्ये मजूर म्हणून कामावर होता.आज सकाळी तो कामावर असतांनाच वातावरणात बदल होत आकाशात ढग गोळा झाले व विजांच्या कडकडाटासह पावसाला सुरुवात झाली.या दरम्यान दिशांतच्या अंगावर वीज पडल्याने त्याचा जागीच दुर्दैवी मृत्यू झाला.घटनेची माहिती मिळताच पुराडा येथील पोलीसांनी घटनास्थळी धाव घेत पंचनामा केला व शव ताब्यात घेत शवविच्छेदनासाठी रुग्णालयात पाठविला.एका मजूर म्हणून काम करणाऱ्या तरुणावर काळाने अचानकपणे झडप घातल्याने कुटुंबियांवर मोठा आघात झाला आहे.