अखेर गगनाला भिडलेले सोने-चांदीचे भाव ट्रम्प इफेक्टने कोसळले…

नागपूर :-गेल्या काही दिवसांमध्ये गगनाला भिडलेले सोने-चांदीचे भाव अखेर ट्रम्प इफेक्टने कोसळले. नागपुरात एप्रिल महिन्यात केवळ पाच दिवसात चांदी किलोमागे जीएसटीविना १२,४०० रुपयांनी घसरली, तर दहा ग्रॅम शुद्ध सोने २,३०० रुपयांनी उतरले.सोने-चांदी स्वस्त झाल्याने लग्नसराईसाठी खरेदी करणाऱ्या ग्राहकांना मोठा दिलासा मिळाला,परंतु भावपातळी पाहता सोन्याचे भाव अजूनही सामान्यांच्या आवाक्याबाहेरच आहेत.दुसरीकडे ग्राहक भाव कमी होण्याची वाट पाहत आहेत.काही दिवसांपासून सुरू असलेला टॅरिफ वॉर आणि डॉलरचे दर कमी झाल्याने भावात घसरण झाल्याचे तज्ज्ञ म्हणतात.सोने आणि चांदीच्या भावाची तुलना केल्यास एप्रिल महिन्यात दोन्ही मौल्यवान धातूंचे भाव जवळपास ८९ हजारांवर आलेत.४ एप्रिलच्या २४ हजारांच्या तुलनेत ५ एप्रिल रोजी चांदी तब्बल ५ हजार रुपयांनी कमी होऊन ८९ हजारांवर,तर सोने ४ एप्रिलच्या ९१,४०० रुपयांच्या तुलनेत ५ एप्रिल रोजी २,३०० रुपयांनी घसरले आणि ८९,१०० रुपयांवर स्थिरावले.भाव अचानक कमी झाल्याने ग्राहकांना खरेदीची संधी आहे.सराफांकडे ३ टक्के जीएसटीसह सोने ९१,७७३ रुपये आणि चांदीचे भाव ९१,६७० रुपये आहेत.