हेलिकॉप्टरने उड्डाण भरली अन् वादळ-वाऱ्याचा जोर.. – उपमुख्यमंत्री एकनाथ शिंदेंसह आठ जण हेलिकॉप्टरमध्ये; इमर्जन्सी लँडिंग..

मुंबई :-राज्याचे उपमुख्यमंत्री तथा शिवसेना नेते एकनाथ शिंदे यांच्या हेलिकॉप्टरला आज,गुरुवार ७ मे रोजी दुपारच्या सुमारास अचानकपणे बदलेल्या खराब हवामानाचा मोठा फटका बसला.मुंबईच्या महालक्ष्मी रेसकोर्स येथून उड्डाण भरलेला हेलिकॉप्टर काही वेळातच वादळी वाऱ्याच्या तडाख्यात सापडला.अश्यातच वैमानिकाने(पायलट)प्रसंगावधान दाखवत हेलिकॉप्टर लगेचच सुरक्षितपणे खाली उतरवल्याने मोठा अनर्थ टळला.

एकनाथ शिंदे हे आज ठाणे जिल्ह्यातील कल्याण आणि मुरबाडच्या दौऱ्यासाठी हेलिकॉप्टरने निघाले होते. हेलिकॉप्टरमध्ये एकनाथ शिंदे,स्विय सहाय्यक प्रभाकर काळे,मुख्य जनसंपर्क अधिकारी विनायक पात्रूडकर, ओएसडी राजपूत,मुख्य सुरक्षा अधिकारी आणि इतर कर्मचारी तसेच पायलट असे एकूण आठ जण होते. हेलिकॉप्टर उड्डाणानंतर थोड्याच वेळात वादळात अडकले.सोसाट्याचा वादळी वारा आणि खराब दृश्यमानतेमुळे हेलिकॉप्टरवर नियंत्रण मिळवणे कठीण झाले होते.अश्यातच संकटाचे स्वरुप लक्षात घेता पायलटने नियंत्रण कक्षाशी समन्वय साधून  हेलिकॉप्टर वादळाच्या तडाख्यातून बाहेर काढून सुरक्षितरित्या मुंबईतील जुहू विमानतळावर इमर्जन्सी लँडिंग केले. यानंतर हेलिकॉप्टरमधील आठ जण सुरक्षितरित्या हेलिकॉप्टरमधून बाहेर पडले.सर्वजण सुरक्षित आणि सुखरुप असून पायलटने प्रसंगावधान राखल्याने मोठी दुर्घटना टळली.