विवाह सारख्या पवित्र नात्याला व्यावसायिक स्वरूप; सर्वोच्च न्यायालयाचा तीव्र संताप..

उद्रेक न्युज वृत्त :-आजही समाजात हुंड्यासाठी अनेक मुलींचा छळ केला जातो आहे.आई-वडिलांना सोडून सासरी जाणाऱ्या मुलीवर केवळ हुंड्यासाठी जीव गमवण्याची वेळ येत असेल तर ती सामाजिक दृष्कृत्याची सर्वांत घृणास्पद अभिव्यक्ती होय.हुंड्याचे दुष्कृत्य,जरी अनेकदा भेटवस्तू किंवा स्वेच्छेने अर्पण म्हणून वेषात आणले जात असले तरी,प्रत्यक्षात ते सामाजिक प्रतिष्ठा दाखवण्याचे आणि लोभ पूर्ण करण्याचे साधन बनले आहे.’हुंडाबळी ही आपल्या समाजाला लागलेली कीड आहे.केवळ हुंड्यासाठी विवाह सारख्या पवित्र नात्याला व्यावसायिक स्वरूप प्राप्त होत आहे आणि जे आजही समाजात अस्तित्वात आहे.ही शोकांतिका आहे; असे सर्वोच्च न्यायालयाने हुंडा प्रथेवर संताप व्यक्त करत विवाहाला अवघे चार महिने झालेल्या विवाहितेला हुंड्यासाठी विष दिल्याचा आरोप असलेल्या पतीचा जामीन अर्ज फेटाळून लावत जामीन देणारा अलाहाबाद उच्च न्यायालयाचा निर्णयही सर्वोच्च न्यायालयाने रद्द केला.

२२ फेब्रुवारी २०२३ रोजी तक्रारकर्त्या वडिलांच्या मुलीचा विवाह सोहळा संपन्न झाला होता.विवाहानंतर  लगेचच तिला अतिरिक्त हुंड्यासाठी,विशेषतः फॉर्च्यूनर कारसाठी क्रूरता आणि छळ सहन करावा लागला होता.दरम्यान, अवघ्या चार महिन्याच्या कालावधीत ५ जून २०२३ रोजी अत्यंत संशयास्पद परिस्थितीत, विष प्राशन केल्याने तिचा मृत्यू झाला.मृत विवाहित महिलेने तिच्या मोठ्या बहिणीला तिच्या मृत्यूच्या रात्री सुमारे दीड वाजता झालेल्या त्रासाबद्दलच्या फोनवर कथन केले होते. ज्यामध्ये तिने महटले होते की,तिच्या पती आणि नातेवाईकांनी तिला जबरदस्तीने काही दुर्गंधीयुक्त पदार्थ पाजले होते.फॉरेन्सिक सायन्स लॅबोरेटरीच्या अहवालात नंतर ॲल्युमिनियम फॉस्फाइड हे विष तिच्या शरीरात आढळल्याचे सिद्ध झाले होते.प्रकरणी खटला उच्च न्यायालयातून सर्वोच्च न्यायालयात पोहचला.सर्वोच्च न्यायालयाने शुक्रवारी म्हटले की, ‘हे न्यायालय या वस्तुस्थितीकडे दुर्लक्ष करू शकत नाही की विवाह त्याच्या खऱ्या स्वरूपात परस्पर विश्वास,सहवास आणि आदरावर आधारित एक पवित्र आणि उदात्त संस्था आहे.तथापि, अलिकडच्या काळात हे पवित्र बंधन दुर्दैवाने केवळ व्यावसायिक व्यवहारात बदलले आहे. आई-वडिलांना सोडून सासरी जाणाऱ्या मुलीवर केवळ हुंड्‌यासाठी जीव गमवण्याची वेळ येत असेल तर ती सामाजिक दृष्कृत्याची सर्वांत घृणास्पद अभिव्यक्ती होय.