वाहनावरील नियंत्रण सुटून वाहन थेट नदीपात्रात पलटी; सात गंभीर जखमींना नागपूरला हलविले.. – पहा व्हिडिओ..

नागपूर :-गडचिरोली जिल्ह्याच्या आल्लापल्ली येथे एका मराठी चित्रपटाचे शूटिंग सुरू होते.शूटिंग संपल्याने शूटिंगचे साहित्य घेऊन नागपूरला परत जात असतांना उमरेड-भिवापूर राष्ट्रीय मार्गावरील मरूनदीच्या वळणावर वाहन चालकाचे वाहनावरील नियंत्रण सुटल्याने आयशर ट्रक साहित्यासह थेट नदीपात्रात शिरून पलटी झाला. यात चालकासह सातजण गंभीर जखमी झाले. पोलिसांनी वळणमार्गावर बॅरिकेडस्च्या स्वरूपात लोखंडी ड्रम लावून ठेवले होते.त्यामुळे थोडक्यात बचावले अन्यथा वाहन थेट नदीपात्रातील पाण्यात पडले असते.

काल शुक्रवारी एमएच ४० बीजी २६१९ क्रमांकाचा आयशर ट्रक शूटिंग आटोपून नागपूरला परत जात होता. परत जात असतांनाच दुपारच्या सुमारास भिवापूर मरूनदी पुलावरील वळणावर चालकाचे नियंत्रण सुटले. नियंत्रण सुटताच ट्रकने मार्गावर असलेल्या लोखंडी ड्रमला धडक देत नदीपात्रात शिरून पलटी झाला.यात चालकासह सातजण गंभीर जखमी झाले.माहिती मिळताच भिवापूरचे पोलीस निरीक्षक जयप्रकाश निर्मल यांनी घटनास्थळी धाव घेत वाहनात दबलेल्या आठही जणांना पोलिसांच्या मदतीने बाहेर काढले.

गोविंद रामजी रघुते वय ३५ वर्षे,रा.नागपूर,आकाश मनोज यादव वय २७ वर्षे,जावेद शेख रमजान मन्सुरी वय २९ वर्षे,दोघेही रा.चवरेलॉन ग्राम, जि.छिंदवाडा,हरीश कुवरमन महेर वय ३४ वर्षे,रा.छिंदवाडा,वसंत रामसिंग डेहरिया वय ४७ वर्षे,रा.मटकाहांडी,जि.छिंदवाडा, अभिषेक शिवप्रसाद यादव वय २२ वर्षे,रा.चक्की खमरिया,जि.शिवणी, मध्यप्रदेश,अनुपकुमार राजेंद्रप्रसाद महंतो वय ३८ वर्षे,रा.कुसैगाबाद,जि.सैकपुरा,बिहार, आनंद देवचंद रॉय वय ३५ वर्षे,रा.विरार,मुंबई अशी जखमींची नावे असून आठपैकी गंभीर सात जणांना नागपूरला हलविण्यात आले.महिनाभरात मरूनदीवर झालेल्या दोन अपघातांत एकाचा मृत्यू,तर पाचजण जलसमाधी मिळण्यापासून थोडक्यात बचावले. दोन्ही अपघातांत बॅरिकेडस्च्या रूपात पोलिसांनी वळणमार्गावर लावलेले लोखंडी ड्रम सुरक्षेची ढाल ठरले.काल शुक्रवारीही हेच ड्रम आठजणांसाठी संजीवनी ठरले आहे.

• व्हिडिओ👇