मद्यधुंद पोलिसाने एकास चिरडले; गावकऱ्यांचा संताप..

उद्रेक न्युज वृत्त :-एका मद्यधुंद पोलिसाने अंगणात झोपलेल्या व्यक्तीस चारचाकी वाहनाने चिरडल्याची घटना सातारा जिल्ह्याच्या कोरेगाव तालुक्यातील सर्कलवाडी येथे आज,शुक्रवार २५ एप्रिलला पहाटेच्या सुमारास घडली.घटनेत रमेश लक्ष्मण सपकाळ यांचा जागीच मृत्यू झाला.घटना घडताच साखरझोपेत असलेला संपूर्ण गाव जागा झाला व घटनास्थळी दाखल होत गावकऱ्यांनी एकच संताप व्यक्त केला. त्यानुसार पोलिसावर गुन्हा दाखल करण्याची मागणी नागरिकांनी केली.

अधिक माहिती अशी की,आरोपी पोलिसांनी आपल्या ताब्यातील कार भरधाव वेगात चालवून आपल्या घराच्या अंगणात झोपलेल्या रमेश लक्ष्मण सपकाळ यांना चिरडले.यात सपकाळ यांचा जागीच मृत्यू झाला.आज शुक्रवारी पहाटे संपूर्ण गाव साखरझोपेत असतांना ही घटना घडली.या धडकेनंतर संपूर्ण गाव जागे झाले.त्यांनी रमेश सपकाळ यांना सावरण्याचा प्रयत्न केला.पण धडक एवढी जोरात होती की त्यांचा जागीच मृत्यू झाला.स्थानिकांच्या मते,आरोपी कारचालक पोलिसाने मद्यप्राशन केले होते.घटनेनंतर सर्कलवाडीचे ग्रामस्थांनी वाठार पोलिस ठाण्याच्या दिशेने धाव घेतली.तिथे त्यांनी निदर्शने करत आरोपी पोलिसावर गुन्हा दाखल करण्याची मागणी केली.त्यानुसार येथे संबंधित पोलिस कर्मचाऱ्यावर गुन्हा दाखल करण्याची प्रक्रिया सुरू झाली होती.आरोपी पोलिसाचे नाव अद्याप स्पष्ट झाले नाही.पण सदरच्या घटनेबाबत मोठा संताप व्यक्त केला जात आहे.