बीअर बारचा परवाना देण्यासाठी पैश्याची लालच; अधिकारी एसीबीच्या जाळ्यात..

आकाश जाधव हे अमरावती जिल्ह्याच्या अचलपूर येथील विभागीय कार्यालयात दुय्यम निरीक्षक म्हणून कार्यरत आहेत.प्रकरणातील तक्रारदार व्यावसायिकाला चिखलदरा मार्गावरील नरसाळा गावात रेस्टॉरंट अँड बारसाठी ‘एफएल-३’ परवाना आवश्यक होता. परवान्यासाठी ऑनलाईन अर्जही केला होता.यासंबंधीची कागदपत्रे १० ऑगस्ट २०२६ रोजी अचलपूर येथील उत्पादन शुल्क कार्यालयात सादर केल्यानंतर,दुय्यम निरीक्षक आकाश जाधव यांनी तक्रारदाराकडे एकूण आठ लाख रुपयांची लाच मागितली होती.यामध्ये स्वतःसाठी तीन लाख आणि वरिष्ठांसाठी पाच लाख रुपये अशी मागणी होती. आवश्यक कागदपत्रांची पूर्तता करूनही परवाना देण्यासाठी त्याला कथितरीत्या त्रास दिला जात होता.लाचेच्या मागणीला कंटाळलेल्या व्यावसायिक तक्रारदाराने १२ ऑगस्ट २०२६ रोजी अमरावतीऐवजी नागपूर येथील लाचलुचपत प्रतिबंधक विभागाकडे तक्रार दाखल केली होती.तक्रारीच्या आधारे २४ ऑगस्ट २०२६ रोजी पंचांसमक्ष पडताळणी करण्यात आली.तडजोडीअंती,आरोपी आकाश जाधव याने स्वतःसाठी अडीच लाख रुपये स्वीकारण्यास सहमती दर्शवली.त्यानुसार,अचलपूर येथील उत्पादन शुल्क कार्यालयातील त्याच्याच कक्षात सापळा रचण्यात आला आणि लाच स्वीकारताच नागपूरच्या एसीबी पथकाने त्याला ताब्यात घेतले.या प्रकरणी परतवाडा पोलीस स्टेशन,अमरावती येथे गुन्हा नोंद करण्याची प्रक्रिया सुरू आहे.सदरची कारवाई लाचलुचपत प्रतिबंधक विभाग नागपूरचे पोलीस अधीक्षक दिगंबर प्रधान,अप्पर पोलीस अधीक्षक माधुरी बाविस्कर आणि विजय माहुलकर यांच्या मार्गदर्शनाखाली पोलीस निरीक्षक राहुल चव्हाण, पोलीस निरीक्षक राजकिरण येवले यांचेसह त्यांच्या पथकाने केली.