बहिणीचा छळ असह्य; जावयाचा साळ्यानेच केला खून.. – ५० हजाराची दिली सुपारी..

गोंदिया ग्रामीण पोलिस ठाण्यांतर्गत येणाऱ्या कारंजा गाव परिसरातील पतंगा चौक ते पोलिस मुख्यालय बायपास मार्गावरील किसान चौकाजवळील एका मोकळ्या प्लॉटमध्ये दोन दिवसांपूर्वी म्हणजेच मंगळवार २३ जून २०२६ रोजी सकाळच्या सुमारास अनमोल रंगारी यांचा मृतदेह आढळून आला होता. डोक्यावर तसेच चेहऱ्यावर गंभीर वार करून हत्या करण्यात आल्याचे पोलीस तपासात उघड झाले होते.त्यानुसार, कारंजा येथील ५८ वर्षीय कपूरचंद मनीराम रंगारी यांनी गोंदिया ग्रामीण पोलीस ठाण्यात तक्रार नोंदवली होती. महत्वाचे म्हणजे,अनमोल रंगारी सोमवार,२२ जूनच्या रात्री सुमारे ९ वाजता दुचाकीने घराबाहेर गेला पडला होता.मात्र,तो रात्रभर परतला नाही आणि मंगळवार २३ जून रोजी मृतदेह आढळून आला होता.पोलिसांनी घटनेचे गांभीर्य लक्षात घेता दोन पथक तयार करुन तपास सुरू केला.दरम्यान, पथकास गोपनीय माहिती मिळाली की,अनमोलचा त्याच्या पत्नीसोबत वाद सुरू असून बहीण आणि साळा नीरज बन्सोड यांनी मिळून पोलिसांत तक्रार दिली असल्याने त्याची चौकशी करून पहा.त्यावरून, पोलिसांनी खुर्शीपारटोला येथून नीरज बन्सोडला ताब्यात घेत पोलिसी खाक्या दाखवताच त्याने आपल्या मित्रासोबत अनमोलची हत्या केल्याचे सांगितले.बहिणीचा छळ करीत असल्याच्या रागातून नीरजने शेजारच्या मध्य प्रदेश राज्यातील नैनपूर येथील त्याचा मित्र रोहित ऊर्फ आयुष नहार बंशकार  याला जावई अनमोल याला ठार मारण्यासाठी ५० हजार रुपयांची सुपारी दिली होती.ठरल्याप्रमाणे सोमवार २२ जून २०२६ रोजी सायंकाळी साडेसात वाजेच्या दरम्यान रोहित बंशकार हा बसने निशांत मंगल बंशकार व राहुल मिश्रा नंदा यांच्यासोबत गोंदियात आला होता.गोंदियात येताच रोहित बंशकार याने माझे मित्र आले असून त्याला सोबत घेऊन ये,असे म्हटले.त्यानुसार,त्यांच्यासोबत दारू पिण्यासाठी नीरज हा जावई अनमोल यालाही घटनास्थळी घेऊन गेला.तेथे दारू पिऊन अनमोलच्या डोक्यावर सब्बलने(खंती)वार करून हत्या केली आणि घटनास्थळावरून पळून गेले.अनमोल हा व्यवसायाने ॲम्ब्युलन्स चालक होता.तसेच खासगी वाहन देखील चालवत होता.तो विवाहित असून त्याच्या पश्चात पत्नी व दोन मुले असा परिवार आहे.अनमोलच्या हत्येने कुटुंबीयांवर दुःखाचा डोंगर कोसळला आहे.