पुलावरून चालत जात असतांना तोल गेला अन् गळफास लागून जीव गेला..!

गडचिरोली :-शेताकडे निघालेल्या एका अविवाहित तरुणाचा नदी पुलाच्या काठावरून पायी चालत जात असतांना अचानकपणे तोल जाऊन त्याची टी-शर्ट पुलाच्या मोडकळीस आलेल्या लोखंडी अँगलमध्ये अडकली.यात टी शर्ट फाटली आणि गळ्याभोवती फास लागल्याने जागीच मृत्यू झाल्याची घटना धानोरा तालुक्याच्या सोडे गाव परिसरात घडली.सुखदेव जणू हलामी वय ३२ वर्षे,रा.सोडे,ता.धानोरा,जि.गडचिरोली

असे मृत पावलेल्या तरुणाचे नाव आहे.सदरची घटना ही काल शुक्रवारी सकाळच्या सुमारास घडली असून आज,शनिवार ३१ जानेवारी रोजी सुखदेव याचे शोकाकुल वातावरणात अंत्यसंस्कार पार पडला.

सुखदेव हलामी हा शुक्रवारी सकाळच्या सुमारास शेताकडे जाण्यासाठी निघाला होता.शेत गावापासून हाकेच्या अंतरावर नदी पलीकडे असल्याने धानोरा मार्गावरील कठाणी नदी पुलाच्या काठावरून पायी चालत जात असतांना अचानक त्याचा तोल गेला. पुलाला कठडे नसल्याने तोल जाताच त्याचे टी-शर्ट पुलाच्या मोडकळीस आलेल्या लोखंडी अँगलला अडकले.यात टी शर्ट फाटून त्याच्या गळ्याभोवती फास लागला.यातच त्याचा मृत्यू झाला.नंतर काही वेळाने मार्गावरून ये-जा करणाऱ्या नागरिकांना तो पुलाच्या कठड्याला लटकलेल्या अवस्थेत दिसून आला.लागलीच घटनेची माहिती तात्काळ गावातील पोलीस पाटील संदीप परसा यांना देण्यात आल्याने त्यांनी धानोरा पोलिसांना पाचारण केले.पोलिसांनी घटनास्थळ गाठून घटनेचा पंचनामा केला व मृतदेह उत्तरीय तपासणीसाठी रुग्णालयात पाठवला.घटनेने मृतक सुखदेवची आई व भावास मोठा धक्का बसला आहे.प्रकरणाचा पुढील तपास धानोरा पोलीस प्रशासन करीत आहे.