निवडणूक कर्तव्यात कसूर प्रकरणी दोन कर्मचारी निलंबित…

गोंदिया :-विधानसभा सार्वत्रिक निवडणुकीच्या अनुषंगाने गोंदिया विधानसभा मतदारसंघ अंतर्गत लघू पाटबंधारे विभागाचे अभियंता अजय रहांगडाले, ग्रामपंचायत अधिकारी हेमंत वसंत लेंढे यांची स्थिर सर्वेक्षण पथक मैदान,आमगाव रोड,गोंदिया या ठिकाणी नियुक्ती करण्यात आली होती.त्यांनी गैरहजर राहून त्यांच्या कर्तव्यात कसूर केल्याने त्यांच्यावर काल,सोमवारी ११ नोव्हेंबर रोजी जिल्हा परिषद मुख्य कार्यकारी अधिकारी यांनी निलंबनाची कारवाई केली.

जिल्हाधिकारी तथा जिल्हा निवडणूक अधिकारी गोंदिया यांनी रविवारी १० नोव्हेंबरच्या रात्री ९:४५ च्या सुमारास स्थिर सर्वेक्षण पथक,पतंगा मैदान आमगाव रोड गोंदिया येथे भेट दिली असता अजय रहांगडाले, उपविभाग गोंदिया पथक क्र.२ (नियुक्तीच्या वेळी दुपारी २ ते रात्री १० पर्यंत) आणि हेमंत वसंत लेंढे, पथक क्र.३ (नियुक्तीच्या वेळी १० ते सकाळी ६ पर्यंत) हे रात्री ११ वाजेपर्यंत आपल्या कर्तव्याच्या ठिकाणी अनधिकृत गैरहजर आढळले.संबंधितांनी आपल्या कर्तव्यात निष्काळजीपणा व बेजबाबदारपणा दाखवून आपल्या कर्तव्यात गंभीर स्वरुपाचे कसूर केल्याने संबंधिताविरुद्ध तात्काळ प्रभावाने निलंबनाची कार्यवाही करण्याबाबत निर्देश दिले.

निवडणूक कामकाज कर्तव्याच्या ठिकाणी अनधिकृत गैरहजर आढळून आल्याने आपल्या कर्तव्यात कसूर केल्याने महाराष्ट्र जिल्हा परिषदा,जिल्हा सेवा (वर्तणूक) नियम १९६७ मधील नियम ३ चा भंग केल्याने कार्यवाहीस पात्र ठरत असल्याने महाराष्ट्र जिल्हा परिषदा,जिल्हा सेवा (शिस्त व अपील) नियम १९६४ चे नियम ३ मधील तरतुदीनुसार जि.प.मुख्य कार्यकारी अधिकारी मुरुगानंथम एम.यांना प्रदान केलेल्या अधिकाराचा वापर करून त्यांनी अजय रहांगडाले व हेमंत लेंढे यांना निलंबित केले आहे.त्यामुळे निवडणूक कामकाज कर्तव्यावर असलेल्या कोणत्याही अधिकारी व कर्मचाऱ्यांनी आपल्या कर्तव्याच्या ठिकाणी अनधिकृत गैरहजर राहू नये; अशी सूचना केली.