धक्कादायक..! धावत्या ट्रेनवर दगडफेक; काचांचे तुकडे प्रवाशांच्या जेवणात..

नागपूर :-नागपूरहून मुंबईच्या दिशेने निघालेल्या दुरंतो एक्स्प्रेसवर दगडफेक झाल्याची धक्कादायक घटना समोर आली आहे.दगडफेकीत ट्रेनच्या एसी कोचच्या खिडक्यांच्या काचा फुटून काचांचे तुकडे थेट प्रवाशांच्या जेवणात पडल्याने एकच खळबळ उडाली.

१२२९० क्रमांकाची दुरंतो एक्सप्रेस ट्रेन काल  शुक्रवारच्या रात्री आठ वाजता नागपूरहून मुंबईसाठी निघाली होती.दरम्यान,बोर्खेडी रेल्वे स्टेशन ओलांडल्यानंतर वर्धा नजीक अज्ञाताने ट्रेनवर दगडफेक केली.या दगडफेकीमध्ये बी-४ डब्याच्या खिडक्यांच्या काचा फुटल्या आणि काचेचे तुकडे थेट प्रवाशांच्या चेहऱ्यावर उडाले.यातील काही तुकडे प्रवाशांच्या जेवणातही पडले.घटनेची माहिती मिळताच आरपीएफ आणि जीआरपी पथकाने बोर्खेडी-सिंधी दरम्यान शोधमोहीम राबवली.मात्र,संशयित व्यक्ती वा ठोस पुरावा हाती लागला नाही. दगडफेकीनंतर ट्रेन वर्धा स्टेशनवर थांबवण्यात आली आणि रेल्वे सुरक्षा दलाकडे तक्रार दाखल करण्यात आली.या घटनेनंतर,रेल्वेच्या मेकॅनिकल टीमने काच दुरुस्त केल्यावर ट्रेन मुंबईकडे रवाना झाली.प्रकरणी अज्ञाताविरोधात रेल्वे कायद्याच्या कलम १५३ अंतर्गत गुन्हा दाखल करण्यात आला व पुढील तपास सुरू करण्यात आला आहे.