दिशाभूल करून खोटी माहिती दिल्याप्रकरणी तरुणीविरोधात अदखलपात्र गुन्ह्याची नोंद.. – बलात्काराचा बनाव केलेले प्रकरण अंगलट..

पुणे :-पुण्याच्या कल्याणीनगर येथील आयटी कंपनीत असलेल्या एका २५ वर्षीय तरुणीने कुरियर डिलिव्हरी बॉयने आपल्यावर घरात घुसून बलात्कार केल्याचा बनाव बुधवार २ जुलै रोजी केला होता. तरुणी गेल्या दोन वर्षापासून पुण्याच्या कोंढव्यातील एका उच्चभ्रू सोसायटीत भावासोबत राहते.बुधवारी २ जुलै रोजी कुरियर डिलिव्हरी बॉय म्हणून आलेल्या तरुणाने घरात घुसून आपल्यावर बलात्कार केल्याची तक्रार तरुणीने पोलिसांना दिली होती.पोलिसांत तक्रार देण्याआधी तरुणीने आपल्या मोबाईल, लॅपटॉपमधील तरुणाशी संबंधित डेटाही डिलीट केला होता.मोठ्या प्रमाणावर बातम्या तसेच केंद्रीय गृहमंत्री अमित शहा यांच्या पुणे दौऱ्याच्या पूर्वसंध्येला सदरची घटना उघड झाल्याने दबावाखाली असलेल्या पोलिसांनी पुण्यापासून दिल्लीपर्यंत तब्बल दोनशे पोलिसांचा फौजफाटा तपासकामी लावला होता. शेकडो सीसीटीव्ही फुटेज,हजारो कॉल रेकॉर्डस तपासले.सर्व कुरिअर कंपन्यांशी संपर्क करून त्यांच्याकडे कामाला असलेल्या मुलांची माहिती मिळवली.

• बॉयफ्रेण्डला माहितीच नव्हती👇

विशेष म्हणजे,सर्वत्र खळबळ उडवून देणाऱ्या या प्रकरणातील आरोपी आपणच आहोत याचा तरुणीचा बॉयफ्रेण्ड असलेल्या तरुणाला पत्ताच नव्हता.गुरुवारी ३ जुलै रोजी नेहमीप्रमाणे त्याने बाणेरमधील आपल्या ऑफीसमध्ये काम केले.नात्यातील एक लग्न असल्याने शुक्रवारी ४ जुलै रोजी तो तिकडे गेला होता.पोलिसांनी या लग्नसोहळ्यातून त्याला ताब्यात घेतले तेव्हा त्याला कळले की आपल्यावर गुन्हा दाखल झालाय आणि घडलेला प्रकार लक्षात आला.पोलिसांनी तरुणाला अटक केल्यानंतर धक्कादायक प्रकार समोर आला.तरुणीने पोलिसांना दिलेली माहिती संपूर्णपणे खोटी,दिशाभूल करणारी,नाहक त्रास व पोलिसांचा वेळ घालवणारी ठरली.त्यामुळे पोलिसांनी बलात्काराचा बनाव व दिशाभूल करून खोटी माहिती दिल्याप्रकरणी  तरुणीविरोधात अदखलपात्र गुन्ह्या दाखल केला आहे.

• डॉ.राजकुमार शिंदे,पोलिस उपायुक्त,पुणे👇

पोलिसांची दिशाभूल करून खोटी माहिती दिल्याप्रकरणी या तरुणीविरोधात पोलिसांनी अदखलपात्र गुन्ह्याची नोंद केली आहे.न्यायालयाच्या परवानगीनंतर पुढील तपास करण्यात येणार आहे.