थरकाप उडवणारी घटना..! तब्बल ४२ नाग सापांची टीम बाहेर पडली असती तर..

नागपूर :-पावसाळ्याच्या दिवसात सर्वत्र डास,किडे व सरपटणाऱ्या प्राण्यांची जिकडे-तिकडे भटकंती सुरू होत असते.अश्यातच एखादा अति विषारी साप नजरेस पडला,तर त्याला पाहून अंगावर काटा उभा राहिल्याशिवाय राहणार नाही.मात्र,एक नाही,दोन नाही तर तब्बल ४० पेक्षा अधिकचे अति विषारी नाग साप घरात असतील आणि ते बाहेर पडले असते तर.. अशीच काहीशी थरकाप उडवणारी घटना नागपूर जिल्ह्याच्या रामटेक तालुक्यातील नेरला गावात रात्रीच्या अंधारात उघडकीस आली आणि कुटुंबीयांची भंबेरी उडाली.नेरला गावातील राजू ढोमणे यांच्या घरात तब्बल ४० नागांची पिल्ले आणि २ मोठे विषारी नाग साप आढळून आल्याने घरातल्या कोणत्याही काना-कोपऱ्यातून कधीही मृत्यूचा विळखा पडू शकला असता,अशा मृत्यूच्या छायेत ढोमणे कुटूंबीय वावरत होते.रात्रीच्या अंधारात साप दिसून आल्याने राजू ढोमणे यांनी तात्काळ सर्पमित्रांना पाचारण केले.सर्पमित्रांनी घरात शोध घेतला असता सर्वप्रथम एक नाग साप दिसून आला.त्यानंतर,घरातील पोकळ जागेत दबा धरून बसलेले नाग पाहून ढोमणे कुटुंबियांच्या पायाखालची जमीनच सरकली. त्यात,तब्बल ४० नागांची पिल्ले आणि दोन मोठे विषारी नाग साप दिसून आले. सर्पमित्रांनी अत्यंत शिताफीने या सर्व नाग आणि पिल्लांना जिवंत पकडल्याने मोठा अनर्थ टळला.मात्र, नाग सापांची तब्बल ४२ जणांची टीम बाहेर पडून गावात फिरली असती तर..