मुसळधार पावसाचा फटका; झाड कोसळल्याने एकाचा मृत्यू..

मुंबई :-राज्याची राजधानी असलेल्या मुंबईत गेल्या काही दिवसांपासून मुसळधार पाऊस कोसळत आहे. मुसळधार पावसामुळे मुंबईत झाड कोसळण्याच्या घटना सुरूच असल्याने यंदाच्या पावसाळ्यात झाड कोसळून दोघांचा मृत्यू झाला आहे.अश्यातच आज, रविवार ५ जुलै रोजी दुपारी पावणे एकच्या सुमारास मुंबईच्या कुर्ला पश्चिम येथील नौपाडा परिसराच्या कमानी भागातील गोम्स गाऊन बिल्डिंग,हिंदी बीएमसी शाळेजवळील दुकानावर झाड कोसळून एका ६३ वर्षीय व्यक्तीचा मृत्यू झाला.युनूस कुंदावाला(शेख)असे या दुर्घटनेत मृत्यू पावलेल्या व्यक्तीचे नाव आहे.

दमदार पावसाने मुंबईच्या विविध परिसरात अनेक ठिकाणच्या रस्त्यांना ओढ्याचे स्वरूप आले आहे. पावसामुळे झाडांना पकडुन असणारी माती वाहू लागल्याने उभी असलेली झाडे उन्मळून पडू लागलीत. अश्याच प्रकारे आज दुपारच्या सुमारास कुर्ला(पश्चिम) येथील नौपाडा परिसरात एक झाड अचानक शेजारील दुकानावर पडला.झाड पडल्याचे निदर्शनास येताच परिसरातील नागरिकांनी घटनास्थळी धाव घेत मदतकार्य सुरू केले.दुर्घटनेत दुकानात असलेले युनूस कुंदावाला हे गंभीर जखमी झाले.दरम्यान,गंभीर जखमी झालेल्या कुंदावाला यांना स्थानिक नागरिकांच्या मदतीने तातडीने जवळच्या फौजिया रुग्णालयात हलवण्यात आले.मात्र, रुग्णालयात जाण्यापूर्वीच त्यांची प्राणज्योत मालवली.