जिल्हा परिषद मुख्य कार्यकारी अधिकाऱ्यांची शाळेला अचानक भेट; शिक्षक अनुपस्थित.. – मुख्याध्यापकासह एक शिक्षक निलंबित..

चंद्रपूर :-आजही काही शाळांमध्ये कडक नियम आणि शिस्त अवलंबिले जाते.एखादा विद्यार्थी शाळेच्या वेळेवर उपस्थित राहिला नाही तर गेटच्या बाहेर ठेवून घरचा रस्ता दाखविला जातो.मात्र, विद्यार्थ्यांना शिस्त लावणारेच शिक्षक वरिष्ठांच्या भेटी दरम्यान अनुपस्थित असतील तर..अश्यांनाही शिक्षा व्हायला पाहिजे की नाही? तर अश्यांना अद्दल घडवलिय जिल्हा परिषदेच्या मुख्य कार्यकारी अधिकाऱ्यांनी.शाळेच्या वेळेवर उपस्थित न राहिल्याने चक्क मुख्याध्यापकासह एका शिक्षकास चंद्रपूर जिल्ह्याचे सीईओ(मुख्य कार्यकारी अधिकारी) पुलकित सिंग यांनी निलंबित केले आहे.

चंद्रपूर जिल्हा परिषदेचे मुख्य कार्यकारी अधिकारी पुलकित सिंग यांचे जिल्ह्यातील शाळांना भेटी देणे सुरू आहे.ते कोणत्या शाळेला भेट देणार याचा काही नेम नाही.त्यामुळे जिल्हा परिषद शाळेतील शिक्षकवृंद संभ्रमात असून नेहमीची सुरू असलेली दिनचर्या पार पाडण्यात मग्न असतात.अश्याच प्रकारे चंद्रपूर जिल्ह्याच्या मूल पंचायत समिती अंतर्गत येणाऱ्या बेलघाटा जिल्हा परिषद शाळेला मुख्य कार्यकारी अधिकारी पुलकित सिंग यांनी अचानक भेट दिली.पहिल्याच भेटीत शाळेचे मुख्याध्यापकच शाळेत यायचे होते.मुख्याध्यापक नसल्याने इतर शिक्षकांची झडती घेण्यात आली.यात एक शिक्षक गायब असल्याचे निदर्शनास आले.सदरची बाब अतिशय गंभीर स्वरूपाची असल्याने मुख्य कार्यकारी अधिकाऱ्यांनी दखल घेत शाळेचे मुख्याध्यापक प्रकाश शेंडे आणि सहाय्यक शिक्षक गीतेश्वर सोनुले यांच्यावर थेट निलंबनाची कारवाई केली.बुधवार २३ जुलै २०२५ रोजी आदेश काढला असून यामुळे जिल्ह्यातील शिक्षकांचे धाबे दणाणले असून पुढील नंबर कुणाचा?अश्या चर्चांना उधाण आले आहे.