चेक पोस्ट नाक्यावर वाहन पास करण्यासाठी एक हजाराची लाच..

नागपूर :-जिल्ह्याच्या रामटेक तालुक्यातील कांद्री येथील चेक पोस्ट नाक्यावर वाहन पास करण्यासाठी एक हजार रुपयांची लाच स्वीकारणाऱ्या मोटार वाहन निरीक्षकासह त्याच्या खासगी एजंटला नागपूर लाचलुचपत प्रतिबंधक विभागाच्या पथकाने अटक केली.दरम्यान,पथकाने चेकपोस्ट कार्यालयाची झडती घेतली असता,तब्बल ४ लाख ३१ हजार २९० रुपयांची रोख रक्कम आढळून आली.याप्रकरणी मोटार वाहन निरीक्षक व एजंट या दोघांना ताब्यात घेत अटक करून रामटेक पोलिसांनी भ्रष्टाचार निवारण अधिनियम १९८८(संशोधित २०१८) नुसार गुन्हा दाखल करून तपास सुरू केला आहे. सदरची कारवाई ११ मार्च रोजी करण्यात आली असून अटक करण्यात आलेल्या आरोपींमध्ये लाचखोर वाहन निरीक्षक अभिजित मधुकर टाले व सुशील विनोद रामटेककर या दोघांचा समावेश आहे.

यातील तक्रारदार हे ट्रेलर चालक असून त्यांनी कांद्री आरटीओ चेक पोस्टमधून ट्रेलर पास करण्यासाठी १ हजार ते दीड हजार रुपयांची लाच मागितली जात असल्याची तक्रार लाच लुचपत प्रतिबंधक विभागाकडे नोंदवली होती.त्यानुसार,तक्रार प्राप्त होताच

एसीबीच्या पथकाने ११ मार्च रोजी पडताळणी केली व सापळा रचला.तक्रारकर्ता ट्रेलर चालक नागपूर ते जबलपूर जाण्यासाठी कांद्री आरटीओ नाक्यावर पोहोचला असता,मोटार वाहन निरीक्षक अभिजित टाले यांच्या अखत्यारित काम करणारा खासगी एजंट सुशील रामटेककर यास १ हजार रुपयांची लाच स्वीकारतांना पंचासमक्ष रंगेहाथ पकडण्यात आले.प्रकरणी नाक्यावर अवैध वसुली करणाऱ्यांचे धाबे दणाणले आहेत.