चिमुकलीचे हात-पाय बांधून अत्याचार करणाऱ्या नराधमास पोलीस कोठडी.. – कोरची तालुक्यातील घटना..

कोरची(गडचिरोली):-गडचिरोली जिल्ह्याच्या कोरची तालुक्यात माणुसकीला काळीमा फासणारी घटना घडली असून एका ५१ वर्षाच्या नराधमाने अकरा वर्षीय चिमुकलीचे हात-पाय बांधून अत्याचार केल्याची घटना दोन दिवसांपूर्वी म्हणजेच बुधवारी दुपारी साडेबारा वाजेच्या सुमारास घडल्याने सर्वत्र संताप व्यक्त करण्यात आला.प्रकरणी पीडितेच्या आईने दिलेल्या तक्रारीवरून कोटगुल पोलिसांनी आरोपीला बेड्या ठोकून काल गुरुवारी न्यायालयात हजर केले असता,न्यायालयाने त्यास एक दिवसाची पोलिस कोठडी सुनावली आहे. धरमसिंग राजाराम कोरेटी वय ५१ वर्षे असे नराधम आरोपीचे नाव आहे.

कोरची तालुक्यातील नराधम आरोपी धरमसिंग याने अकरा वर्षीय चिमुकलीला बुधवारी दुपारच्या सुमारास घरात बोलावले.घरात बोलावून तिचे हात-पाय बांधून  अत्याचार केला व घटनेबाबत कुठे वाच्यता केल्यास

जीवे मारण्याची धमकी दिली.घडलेल्या प्रकाराबाबत चिमुकलीने आईला सांगताच पायाखालची जमीनच सरकली.लागलीच पीडितेच्या आईने कोटगुल पोलीस ठाण्यात धाव घेत तक्रार नोंदवली.प्रकरणाचे गांभीर्य लक्षात घेता कोटगुल पोलिसांनी नराधमास अटक करून न्यायालयात हजर केले.आरोपीने यापूर्वीही पीडितेसोबत जवळीक साधून अश्लील चाळे करण्याचा प्रयत्न केल्याची धक्कादायक बाब तपासात समोर आली आहे. पोलिसांनी पोलीस कोठडी मागताच आरोपीस एक दिवसाची कोठडी देण्यात आली आहे.