खळबळजनक घटना; शौचालयाच्या खड्ड्यात आढळला मृतदेह..

गडचिरोली :-जिल्ह्याच्या एटापल्ली शहरात आज, रविवार २८ डिसेंबर रोजी चक्क शौचालयाच्या खड्ड्यात एका अज्ञात इसमाचा मृतदेह आढळून आल्याने परिसरात एकच खळबळ उडाली आहे.

माहितीनुसार,एटापल्ली शहरातील कुणाल तुळशीराम करमरकर यांचे शहरालगत असलेल्या नगर पंचायतच्या मागील भागात नवीन घराचे बांधकाम सुरू आहे.यासाठी घराच्या दुसऱ्या रूममध्ये शौचालयाचा खड्डा तयार करण्यात आला आहे.अश्यातच आज घराचे काम सुरू असल्याने पाहणी दरम्यान शौचालयाच्या खड्ड्यात एका अज्ञात इसमाचा निर्वस्त्र मृतदेह आढळून आल्याने एकच धांदल उडाली.घटनेची माहिती तात्काळ एटापल्ली पोलिसांना देण्यात आली.लागलीच एटापल्ली पोलीस ठाण्याचे पोलिस उपनिरीक्षक गजानन साखरे पोलिस पथकासह घटनास्थळी दाखल झाले.मृतदेहाची पाहणी करून पंचनामा करण्यात आला.शौचालयाच्या खड्ड्यात आढळून आलेला मृतदेह कुणाचा?मृत्यूचे नेमके कारण काय?असे अनेक प्रश्न अनुत्तरित असल्याने त्या दिशेने तपास सुरू करण्यात आला असल्याचे पोलिस उपनिरीक्षक गजानन साखरे यांनी स्पष्ट केले. घटनेने परिसरात एकच खळबळ माजली असून परिसरात शंका-कुशंका वाढीस लागली आहे.