क्रिकेटपटू तरुणीने उचलले टोकाचे पाऊल; गळफास घेऊन संपवले जीवन..

नागपूर :-क्रिकेटच्या मैदानावर मोठे नाव कमावण्याची स्वप्ने उराशी बाळगणाऱ्या एका १७ वर्षीय क्रिकेटपटू तरुणीने गळफास घेऊन जीवन संपवल्याची घटना नागपूरच्या बजाजनगर पोलिस ठाण्याच्या हद्दीतील लक्ष्मीनगर परिसरात उघडकीस आली.अदिती मोरेश्वर चौखंडे असे मृतक क्रिकेटपटू तरुणीचे नाव असून ती मूळची अकोला येथील रहिवासी होती.क्रिकेटपटू होण्याचे स्वप्न पूर्ण करण्यासाठी ती २ वर्षांपासून तिच्या आईसोबत नागपुरात वास्तव्यास होती.अश्यातच ३ महिन्यांपूर्वीच चौखंडे कुटुंब लक्ष्मीनगर येथील उमालक्ष्मी अपार्टमेंटमध्ये राहायला आले होते.तिचे वडील कंत्राटदार असून तिचा भाऊ क्रिकेटर आहे.क्रिकेटमध्ये कारकीर्द घडविण्याच्या उद्देशाने अदितीने नागपुरातील सुर्वे क्रिकेट अकादमीत प्रशिक्षण सुरू केले होते.अलीकडेच विदर्भक्रिकेट असोसिएशनच्या निवड चाचण्या झाल्या. मात्र,अंतिम निवडीत तिचे नाव नसल्याने ती मानसिक तणावाखाली गेली.घटनेच्या दिवशी म्हणजेच काल गुरुवारच्या सकाळी अदितीची आई तिला झोपेतून जागे करण्यासाठी गेली असता,ती खोलीतील दार उघडत नसल्याने जोर-जोराने ओरडू लागली.दरम्यान,शेजाऱ्यांनी धाव घेत दार उघडुन बघीतले असता अदिती गळफास घेतलेल्या अवस्थेत दिसून आली.लागलीच शेजाऱ्यांच्या मदतीने तिला खाली उतरवून शासकीय वैद्यकीय महाविद्यालयाच्या रुग्णालयात नेले.मात्र,वैद्यकीय अधिकाऱ्यांनी तिला मृत घोषित केले.घटनेची माहिती मिळताच बजाजनगर पोलिसांनी घटनास्थळाचा पंचनामा करून मृतदेह शवविच्छेदनासाठी रुग्णालयात पाठवला. पंचनामा करत असतांनाच घटनास्थळावर पोलिसांना अदितीने लिहिलेली एक सुसाईड नोट सापडली.त्यात, तिने आई-वडिलांची माफी मागितली आणि क्रिकेटर असलेल्या भावाला उद्देशून लिहिले, ‘तुझी निवड झाली आहे.तू चांगला खेळ…आई-बाबांचे नाव मोठे कर.’ अशा भावनिक शब्दांनी लिहिलेल्या चिठ्ठीतील शब्द कानावर पडताच अनेकांचे डोळे भरून आले.