आता शेतकऱ्यांना खतांची माहिती मिळणार एका क्लिकवर.. – खतांचा साठा,खतांचे प्रकार व केंद्र चालकांचे मोबाईल क्रमांक..

गडचिरोली :-शेतकऱ्यांना रासायनिक खतांची माहिती घरबसल्या,सहज आणि पारदर्शक पद्धतीने उपलब्ध करून देण्यासाठी गडचिरोली जिल्हा परिषदेच्या कृषी विभागाने Blogspot या सुलभ व लोकप्रिय माध्यमाचा वापर करून ‘खते माहिती प्रणाली’ कार्यान्वित केली असल्याची माहिती जिल्हा कृषी विकास अधिकारी श्रीमती किरण खोमणे यांनी दिली आहे.जिल्ह्यातील सर्व कृषि सेवा केंद्रांवरून खरीप आणि रब्बी हंगामात विविध प्रकारच्या अनुदानित रासायनिक खतांची विक्री केली जाते. मात्र,अनेकदा शेतकऱ्यांना खतांची उपलब्धता वेळेवर समजत नसल्याने त्यांचा वेळ,पैसा व श्रम वाया जातात.याच पार्श्वभूमीवर,कृषि विभागाने शेतकऱ्यांसाठी एक प्रगत,पारदर्शक व डिजिटल पर्याय उपलब्ध करून दिला आहे.

• एक क्लिक करा आणि पहा संपूर्ण माहिती👇 

 https://adozpgadchiroli.blogspot.com/2025/07/blog-post.html

वरील लिंक ब्लॉगच्या माध्यमातून शेतकऱ्यांना त्यांच्या तालुक्यातील कृषि सेवा केंद्रांमध्ये उपलब्ध असलेल्या खतांचा साठा,खतांचे प्रकार,केंद्र चालकांचे मोबाईल क्रमांक यांसह इतर आवश्यक माहिती सहजपणे मिळू शकते.ही माहिती जिल्हानिहाय,तालुकानिहाय आणि केंद्रनिहाय स्वरूपात दररोज अद्ययावत करण्यात येते.

या प्लॅटफॉर्मचा उपयोग करून शेतकरी खत खरेदीचे अचूक नियोजन करू शकतात आणि गरजेनुसार योग्य केंद्राची निवड करू शकतात.ब्लॉगपेज वापरणे अत्यंत सुलभ असून,कोणतेही ॲप डाऊनलोड न करता हे कोणत्याही स्मार्टफोनवर मोफत चालू शकते. ही माहिती संपूर्णतः पारदर्शक असून सार्वजनिक वापरासाठी खुली आहे.

• किरण खोमणे,जिल्हा कृषी विकास अधिकारी👇

डिजिटल यंत्रणांचा प्रभावी वापर करून आम्ही शेतकऱ्यांना वेळेत आणि अचूक माहिती देण्याचा प्रयत्न करत आहोत.या उपक्रमामुळे खत खरेदी सुलभ होणार असून,शेतकऱ्यांचा वेळ,पैसा व श्रम वाचणार आहे.