आज ‘अरुणोदय’ सिकलसेल ॲनिमिया विशेष मोहिमेचा जिल्हास्तरीय शुभारंभ..

गडचिरोली :-जिल्ह्यातील सिकलसेल आजाराचे समूळ उच्चाटन करण्याच्या उद्देशाने आरोग्य विभागाने ‘अरुणोदय’ सिकलसेल ॲनिमिया विशेष मोहिमेची प्रभावी सुरुवात केली असून आज,गुरुवार १५ जानेवारी रोजी जिल्हा सामान्य रुग्णालय गडचिरोली येथे या मोहिमेचा जिल्हास्तरीय उद्घाटन सोहळा उत्साहात पार पडला.या कार्यक्रमाचे उद्घाटन आमदार डॉ.मिलिंद नरोटे यांच्या हस्ते करण्यात आले.प्रमुख अतिथी म्हणून जिल्हा परिषदेचे मुख्य कार्यकारी अधिकारी सुहास गाडे व नगराध्यक्ष ॲड.प्रणोती निंबोरकर,तर कार्यक्रमाच्या अध्यक्षस्थानी जिल्हा शल्य चिकित्सक डॉ.वर्षा लहाडे तसेच नगरसेवक शेखर आखाडे व जिल्हा आरोग्य अधिकारी डॉ.प्रताप शिंदे उपस्थित होते.

उद्घाटनप्रसंगी आमदार डॉ.मिलिंद नरोटे यांनी सिकलसेल हा केवळ वैद्यकीय नव्हे तर सामाजिक प्रश्न असल्याचे नमूद केले. “लोकसहभागातून आणि व्यापक तपासणी व प्रबोधनातूनच सिकलसेल मुक्त गडचिरोलीचे स्वप्न साकार होईल,” असे सांगत त्यांनी नागरिकांना तपासणीस पुढे येण्याचे आवाहन केले.

मुख्य कार्यकारी अधिकारी सुहास गाडे यांनी मोहिमेची व्याप्ती गावस्तरापर्यंत वाढवण्याचे निर्देश दिले.दुर्गम व अतिदुर्गम भागातील प्रत्येक नागरिकांपर्यंत स्क्रीनिंग पोहोचवून वेळीच निदान व उपचार सुनिश्चित करण्यावर त्यांनी भर दिला.

नगराध्यक्ष ॲड.प्रणोती निंबोरकर यांनी जनजागृतीची भूमिका अधोरेखित करत सामाजिक स्तरावर व्यापक प्रबोधनाची आवश्यकता व्यक्त केली.जिल्हा आरोग्य अधिकारी डॉ.प्रताप शिंदे यांनी पथनाट्यांतून दिलेला संदेश समाजात पोहोचल्यास सिकलसेल निर्मूलन सहज शक्य असल्याचे सांगितले.आरोग्य यंत्रणा सर्व विभागांच्या सहकार्याने मोहीम यशस्वी करणार असल्याचे त्यांनी स्पष्ट केले.त्याचबरोबर,जिल्हा शल्य चिकित्सक डॉ.वर्षा लहाडे यांनी हायड्रॉक्सी युरिया उपचारांच्या प्रभावी वापरामुळे सिकलसेलमुळे होणाऱ्या गंभीर रुग्णसंख्येत घट झाल्याचे नमूद केले.

कार्यक्रमाचे विशेष आकर्षण म्हणजे,जिल्हा सामान्य रुग्णालय नर्सिंग स्कूलच्या विद्यार्थिनींनी सादर केलेली दोन पथनाट्ये.सिकलसेल आजाराची लक्षणे, विवाहापूर्व तपासणीचे महत्त्व, ‘कुंडलीपेक्षा सिकलसेल रिपोर्ट पाहा’ हा समाजोपयोगी संदेश आणि आजारावर मात करण्यासाठी आवश्यक काळजी यांचे प्रभावी सादरीकरण विद्यार्थिनींनी केले. या कलाविष्काराबद्दल मान्यवरांनी त्यांचे विशेष कौतुक करून शाबासकी दिली.

या कार्यक्रमास जिल्हा महिला रुग्णालयाच्या अधीक्षक डॉ.माधुरी किलनाके,अतिरिक्त जिल्हा शल्यचिकित्सक डॉ.मनिष मेश्राम,निवासी वैद्यकीय अधिकारी डॉ. बागराज धुर्वे फिजिशियन डॉ.इंद्रजीत नागदेवते,डॉ. प्रशांत पेंदाम व डॉ.प्रफुल गोरे यांची प्रमुख उपस्थिती होती.

कार्यक्रमाचे प्रास्ताविक सिकलसेल नोडल अधिकारी तथा अतिरिक्त जिल्हा आरोग्य अधिकारी डॉ.अमित साळवे यांनी केले. ‘अरुणोदय’ मोहिमेची व्याप्ती व उपलब्ध आरोग्य सुविधांची माहिती त्यांनी दिली. आभार प्रदर्शन जिल्हा सिकलसेल समन्वयक रचना फुलझेले यांनी केले.तर कार्यक्रमाच्या यशस्वीतेसाठी जिल्हा सामान्य रुग्णालयातील सर्व डॉक्टर व कर्मचारी, सूत्रसंचालन करणाऱ्या रुचिता सयाम व प्रिया चाचेरे, प्राचार्य परिचर्या प्रशिक्षण केंद्र गडचिरोलीच्या मेघा कुळसंगे,नर्सिंग स्कूलची चमू,साई नर्सिंग स्कूलचे प्राचार्य, सिकलसेल समुपदेशक नीता बालपांडे तसेच आरोग्य कर्मचाऱ्यांनी परिश्रम घेतले.