आजपासून शहीद नक्षल सप्ताह; पोलीस दलांना सतर्क राहण्याचे आदेश..!

गडचिरोली :-जिल्ह्यात नक्षलवाद्यांचा बोलबाला कमी झाला असला तरीही नक्षलवादी चोरी-छुपे डोके वर काढून हिंसक कारवाया करू शकतात.अश्यातच पोलीस चकमकीत खात्मा करण्यात आलेल्या नक्षल्यांच्या स्मरणार्थ आज,सोमवार २८ जुलै पासून ते ३ ऑगस्ट या कालावधीत नक्षल्यांकडून शहीद सप्ताह साजरा करण्यात येत असल्याने सदरच्या काळात नक्षलवादी नक्षली स्मारके तयार करून बॅनर लावत असतात.या कालावधीत नक्षलवादी हिंसक घटना घडवण्याची शक्यता असते.शहीद सप्ताहाच्या पार्श्वभूमीवर नक्षल्यांकडून कोणतीही हिंसक घटना घडू नये म्हणून,जिल्हा पोलिस दलाकडून नक्षलविरोधी अभियान तीव्र करण्यात आले आहे.शहीद सप्ताहात पोलिस विभाग नक्षलवाद्यांच्या कारवायांवर करडी नजर ठेवण्यासाठी ड्रोनचा वापर करणार आहेत. विशेषतः या सप्ताहात वैद्यकीय रजा वगळता पोलिस अधिकारी आणि जवानांच्या सर्वप्रकारच्या रजा रद्द करण्यात आले असून जिल्हा पोलिस दल सतर्क झाले आहे.यासोबतच गडचिरोली जिल्हा पोलिस अधीक्षक नीलोत्पल यांनी जिल्ह्यातील सर्व पोलिस ठाणे, उपपोलिस ठाणे आणि पोलिस मदत केंद्रांना सतर्क राहण्याचे आदेश दिले आहेत.