अवैध रेतीची वाहतूक; दोन हायवा ट्रक जप्त..!

चंद्रपूर :-जिल्ह्याच्या जुनोना परिसरात अवैध रेतीची वाहतूक करणाऱ्या दोन हायवा ट्रकवर पोलिसांनी धडक कारवाई केली.या कारवाईत हायवा चालक सुमित संतोष टेंभूर्णे वय ४२ वर्षे,रा.अष्टभुजा वॉर्ड,चंद्रपूर आणि नितीन मनराज कातकर वय ३९ वर्षे,रा.घोडपेट सायवन, ता.भद्रावती,जि.चंद्रपूर यांना ताब्यात घेण्यात आले असून वाहनांसह रेती असा एकूण ५१ लाख १९ हजार रुपयांचा मुद्देमाल जप्त करण्यात आला.

सहायक पोलीस अधीक्षक कुमार सुशांत हे एसडीपीओ कार्यालय व बल्लारपूर पोलीस ठाण्याच्या पथकासह बल्लारपूर पोलिस ठाण्याच्या हद्दीत गस्त घालत होते. यावेळी पहाटे साडेचार वाजताच्या सुमारास पोंभूर्णा मार्गाने एमएच ३४ सीक्यू ९९९६ व एमएच ३६ एए ८७०० क्रमांकाचे दोन हायवा ट्रक येतांना दिसून आले. येणाऱ्या दोन हायवांवर संशय आल्याने जुनोना परिसरात त्यांची तपासणी करण्यात आली.तपासणीदरम्यान दोन्ही हायवांमध्ये रेती भरलेली आढळून आली.सदर रेतीची वाहतूक अवैध पद्धतीने केली जात असल्याचे निदर्शनास आल्यानंतर कुमार सुशांत यांच्या नेतृत्वाखाली पोलिसांनी दोन्ही हायवा ट्रक ताब्यात घेतले व पुढील प्रक्रिया पार पाडण्यात आली.या धडक कारवाईमुळे अवैध रेती वाहतूक करणाऱ्यांमध्ये खळबळ उडाली आहे.