अखेर लाडक्या बहिणींची प्रतीक्षा संपली; एप्रिल महिन्याचे १५०० रुपये येणार खात्यात..

उद्रेक न्युज वृत्त :-सध्या स्थितीत राज्यात मुख्यमंत्री माझी लाडकी बहीण योजनेचे २ कोटी ४७ लाख लाभार्थी असून आता पर्यंत पात्र लाभार्थी महिलांच्या खात्यात योजनेचे नऊ हप्ते म्हणजेच १३ हजार ५०० रुपये जमा करण्यात आले आहेत.अशातच एप्रिल महिना संपूनही खात्यात रक्कम जमा करण्यात आली नसल्याने पंधराशे रुपये कधी होणार जमा? याकडे लाडक्या बहिणी टक लावून बसल्या होत्या.त्यातच

महिला व बालविकास मंत्री अदिती तटकरे यांनी अक्षय्य तृतीयेच्या औचित्यावर बहि‍णींच्या खात्यात पैसे जमा होतील,असे जाहीर केले होते.मात्र एप्रिल महिना संपूनही अद्याप महिलांच्या खात्यावर पैसे जमा झालेले नाहीत.अशातच आता यासंदर्भात अदिती तटकरेंनी त्यांच्या एक्स हँडलवर ट्विट करत यासंदर्भात माहिती दिली आहे.ट्विट मध्ये त्यांनी लिहिले की, ‘मुख्यमंत्री माझी लाडकी बहिण’ या महत्वाकांक्षी योजनेअंतर्गत एप्रिल महिन्याचा सन्मान निधी,पात्र लाभार्थी लाडक्या बहिणींच्या आधार लिंक असलेल्या बँक खात्यांमध्ये जमा करण्याची प्रक्रिया आजपासून सुरू करण्यात येत आहे व पुढील २ ते ३ दिवसांत ही प्रक्रिया पूर्ण होईल आणि सर्व पात्र लाभार्थींच्या खात्यात थेट निधी प्राप्त होईल,त्यामुळे लाडक्या बहिणींची प्रतीक्षा संपलीच म्हणावे लागेल.