४ हजार रुपयांसाठी सहाय्यक आरटीओ अन् कनिष्ठ लिपिक अडकला एसीबीच्या जाळ्यात..!

नागपूर :-ट्रकवर कारवाई न करण्यासाठी ट्रक चालकाकडून चार हजार रुपयांची लाच घेणाऱ्या नागपूर ग्रामीणमधील सहाय्यक परिवहन अधिकारी (सहाय्यक आरटीओ)व कनिष्ठ लिपिकाला एसीबीने अटक केल्याने कारवाईमुळे परिवहन विभागात एकच खळबळ उडाली. अनुप सानप असे सहाय्यक परिवहन अधिकाऱ्याचे नाव असून मोहन दिवटे हा कनिष्ठ लिपिक आहे.संबंधित तक्रारदाराचा गिट्टीचा ट्रक आरटीओच्या पथकाने अडविला होता.ओव्हरलोड असल्याने त्याच्यावर ५० हजार ७५० रुपयांची चालान फाडून कारवाई करण्यात आली होती.तक्रारदार नागपूर ग्रामीण येथील प्रादेशिक परिवहन कार्यालयात गेला असता तेथे ट्रक सोडण्यासाठी दिवटेने पाच हजारांच्या लाचेची मागणी केली.लाच देण्याची इच्छा नसल्याने ट्रकमालकाने एसीबीकडे तक्रार केली.तक्रारीची शहानिशा झाल्यावर एसीबीने सापळा रचला.काल शुक्रवारी दुपारच्या सुमारास तक्रारदार दिवटेला भेटला.दिवटेने पाच हजार रुपयांत ट्रक सोडण्यासाठी सहाय्यक प्रादेशिक परिवहन अधिकारी सानपने परवानगी दिल्याचे सांगितले.तक्रारदाराने दिवटेला चार हजार रुपये रोख दिले व एसीबीच्या पथकाने त्याला रंगेहाथ पकडले.पोलिसांनी सानपलादेखील ताब्यात घेतले.दोन्ही आरोपींविरोधात कपिलनगर पोलिस ठाण्यात गुन्हा दाखल करण्यात आला आहे.सदरची कारवाई पोलिस निरीक्षक राजकिरण येवले,जितेंद्र वैरागडे,भरत ठाकूर,हेमराज गांजरे,दीपाली भगत,होमेश्वर वाईलकर,राजेंद्र जांभूळकर यांच्या पथकाने केली.