सावधान..! गॅस सिलेंडर बुकिंगच्या नावाने ऑनलाईन फसवणूकीचा नवा फंडा..

उद्रेक न्युज वृत्त :-सध्याच्या घडीला सर्वत्र घरगुती गॅस सिलेंडरची बोंबाबोंब सुरू असून गॅस सिलेंडरच्या वाढत्या मागणीचा गैरफायदा घेत गॅस बुकिंगच्या नावाखाली ऑनलाइन फसवणुकीच्या घटना झपाट्याने वाढत आहेत.सायबर गुन्हेगार नागरिकांच्या बँक खात्यांवर डोळा ठेवून विविध क्लृप्त्या वापरत असल्याचे अनेक प्रकरणांतून उघड झाले आहे.फोन कॉल,बनावट वेबसाइट,सोशल मीडियावरील संदेश तसेच व्हॉट्सॲप लिंकच्या माध्यमातून गॅस बुकिंग किंवा सबसिडी अपडेट करण्याचे आमिष दाखवले जात आहे.सायबर चोरटे स्वतःला गॅस एजन्सीचे कर्मचारी असल्याचे भासवून ग्राहकांशी संपर्क साधतात. “तुमची गॅस सबसिडी अपडेट करायची आहे”, “बुकिंग कन्फर्म करा” किंवा “गॅस कनेक्शन बंद होईल” अशा कारणांनी नागरिकांना घाईत माहिती देण्यास भाग पाडले जाते.त्यानंतर मोबाईलवर लिंक पाठवली जाते किंवा ॲप डाउनलोड करण्यास सांगितले जाते.ही लिंक किंवा ॲप बनावट असून त्यावर वैयक्तिक व बँक तपशील भरताच सायबर गुन्हेगार खात्यावर ताबा मिळवतात.यानंतर काही मिनिटांतच बँक खात्यातून हजारो ते लाखो रुपयांची रक्कम काढली जात असल्याच्या घटना वाढल्या आहेत.अनेकांना पैसे कापल्यानंतरच फसवणुकीची जाणीव होते.विशेषतः ज्येष्ठ नागरिक आणि डिजिटल व्यवहारांबाबत कमी माहिती असलेले लोक या जाळ्यात अधिक अडकत आहेत.सायबर तज्ज्ञांच्या मते,गुन्हेगार लोकांच्या भीतीचा आणि सध्याच्या परिस्थितीचा फायदा घेतात. “सबसिडी थांबेल” किंवा “कनेक्शन बंद होईल” अशा धमक्या देऊन नागरिकांना तात्काळ कृती करण्यास भाग पाडले जाते.मात्र बँक किंवा गॅस एजन्सी कधीही फोनवरून ओटीपी किंवा बँक तपशील मागत नाही,हे लक्षात ठेवणे अत्यंत महत्त्वाचे आहे.