रेल्वेच्या धडकेत दोन सख्ख्या भावांचा दुर्दैवी मृत्यू..

नागपूर :-रेल्वेच्या धडकेत दोन सख्ख्या भावांचा  दुर्दैवी मृत्यू झाल्याची घटना नागपूर जिल्ह्याच्या सावनेर तालुक्यातील मालेगाव टाऊन परिसरात आज,गुरुवार ३० जुलै रोजी सकाळच्या सुमारास उघडकीस आली.निरंजन लक्ष्मण फिरके वय ४० वर्षे व योगेश लक्ष्मण फिरके वय ३७ वर्षे,रा.सावनेर,ता.सावनेर,जि.नागपूर अशी मृतक भावांची नावे  आहेत.धडक इतकी भीषण होती की दोन्ही भावांचे मृतदेह छिन्नविछिन्न अवस्थेत आढळून आले.सदरची दुर्घटना नेमकी कशामुळे घडली,अद्याप स्पष्ट झाले नसून सावनेर पोलीस प्रशासनाकडून प्रत्यक्षदर्शी तसेच इतर उपलब्ध पुराव्यांच्या आधारे तपास सुरू आहे.घटना उघडकीस येताच याबाबतची माहिती अंकित हांडे यांनी सामाजिक कार्यकर्ते हितेश बनसोड यांना दिली.त्यानंतर,तात्काळ सावनेर पोलीस ठाण्याचे पोलीस निरीक्षक ऋतुजा जाधव यांना याची माहिती देण्यात आली.माहिती मिळताच सावनेर पोलीस पथकासह घटनास्थळी दाखल झाले.दरम्यान,स्थानिक ग्रामस्थांच्या मदतीने दोन्ही मृतदेह शासकीय रुग्णालयात नेण्यात आले.तेथे डॉक्टरांनी तपासणी अंती दोघांनाही मृत घोषित केले.दोन सख्ख्या भावांचा एकाच दुर्घटनेत मृत्यू झाल्याने सर्वत्र हळहळ व्यक्त केली जात आहे.