राज्य सरकारी कर्मचाऱ्यांप्रमाणेच एसटी कर्मचाऱ्यांच्या महागाई भत्त्यात वाढ..

मुंबई :-एसटी अर्थात राज्य परिवहन महामंडळाच्या  कर्मचाऱ्यांचा महागाई भत्ता राज्य सरकारी कर्मचाऱ्यांप्रमाणे ५३ टक्क्यांवरून ५८ टक्क्यांपर्यंत वाढविण्याची घोषणा आज,मंगळवार २३ जून रोजी राज्याचे परिवहन मंत्री तथा एसटी महामंडळाचे अध्यक्ष प्रताप सरनाईक यांनी विधिमंडळात केली.त्याचबरोबर कर्मचाऱ्यांच्या घरभाडे भत्त्यातही वाढ जाहीर करण्यात आली.सध्या विधिमंडळाचे पावसाळी अधिवेशन मुंबईत सुरू आहे.या अधिवेशनात घोषणा करतांना सरनाईक म्हणाले की,राज्य सरकारी कर्मचाऱ्यांप्रमाणे एसटी कर्मचाऱ्यांचा महागाई भत्ता ५३ टक्क्यांवरून ५८ टक्के करण्यात येत आहे.त्याचबरोबर,घरभाडे भत्ता ८,१६,२४ टक्क्यांवरून वरून १०,२० आणि ३० टक्के,वार्षिक वेतन वाढीचा दर दोन टक्क्यांवरून तीन टक्के करण्यास मंजुरी देण्यात येत आहे.कर्मचाऱ्यांचा महागाई भत्ता, घरभाडे भत्ता आणि वार्षिक वेतनवाढीची थकबाकी मिळून सुमारे ५ हजार ६४९ कोटी रुपये अदा करण्यास शासन कटिबद्ध आहे,असेही त्यांनी नमूद केले.एसटी ही महाराष्ट्राच्या सर्वसामान्य जनतेची जीवनवाहिनी आहे. गेली आठ दशके शेतकरी,विद्यार्थी,कामगार, महिला व ज्येष्ठ नागरीक,आदिवासी आणि दुर्गम भागातील लाखो नागरिकांना जोडून ठेवले आहे.या लालपरीचा खरा आधारस्तंभ म्हणजे एसटीचे कर्मचारी.उन्हाळा असो, पावसाळा असो वा इतर काहीही असो,या कर्मचाऱ्यांचे योगदान शब्दांत मांडणे कठीण आहे; असेही सरनाईक म्हणाले.