मतदार याद्यांच्या विशेष सखोल पुनरीक्षणाचा सुधारित कार्यक्रम जाहीर..

गडचिरोली :-भारत निवडणूक आयोगाने मतदार याद्यांच्या विशेष सखोल पुनरीक्षण-२०२६(Special Intensive Revision-SIR)कार्यक्रमात सुधारणा केली असून,सुधारित वेळापत्रक जाहीर करण्यात आले आहे.त्यानुसार,येत्या ३१ ऑगस्ट २०२६ रोजी प्रारूप मतदार याद्यांची प्रसिद्धी करण्यात येणार असून,४ नोव्हेंबर २०२६ रोजी अंतिम मतदार याद्या प्रसिद्ध करण्यात येणार आहेत.

भारत निवडणूक आयोगाने १४ मे २०२६ रोजीच्या पत्रान्वये मतदार याद्यांच्या विशेष सखोल पुनरीक्षणाचा कार्यक्रम जाहीर केला होता.त्यानंतर आयोगाच्या १९ ऑगस्ट २०२६ रोजीच्या पत्रानुसार या कार्यक्रमाचे सुधारित वेळापत्रक निश्चित करण्यात आले आहे.

सुधारित कार्यक्रमानुसार मतदान केंद्रांचे सुसूत्रीकरण व पुनर्रचना २४ ऑगस्ट २०२६ रोजी करण्यात येणार आहे.त्यानंतर ३१ ऑगस्ट २०२६ रोजी प्रारूप मतदार याद्यांची प्रसिद्धी केली जाणार आहे.प्रारूप मतदार यादी प्रसिद्ध झाल्यानंतर नागरिकांना त्यातील नोंदी तपासता येणार असून,आवश्यकतेनुसार दावे व हरकती दाखल करता येतील.

• दावे व हरकतींसाठी महिनाभराची मुदत👇

प्रारूप मतदार याद्यांवरील दावे व हरकती दाखल करण्यासाठी ३१ ऑगस्ट ते ३० सप्टेंबर २०२६ असा कालावधी निश्चित करण्यात आला आहे.या कालावधीत प्राप्त होणाऱ्या दावे व हरकतींवर निवडणूक यंत्रणेमार्फत नियमानुसार कार्यवाही करण्यात येणार आहे.

दावे व हरकतींच्या अनुषंगाने नोटीस देणे तसेच प्राप्त दावे व हरकती निकालात काढण्याची प्रक्रिया ३१ ऑगस्ट ते २९ ऑक्टोंबर २०२६ या कालावधीत पूर्ण करण्यात येईल.सर्व दावे व हरकती निकाली काढल्यानंतर मतदार यादीला अंतिम स्वरूप देण्यात येणार आहे.

• ४ नोव्हेंबरला अंतिम मतदार यादी👇

विशेष सखोल पुनरीक्षणाची संपूर्ण प्रक्रिया पूर्ण झाल्यानंतर ४ नोव्हेंबर २०२६ रोजी अंतिम मतदार याद्यांची प्रसिद्धी करण्यात येणार आहे.मतदारांनी प्रारूप मतदार यादी प्रसिद्ध झाल्यानंतर आपले नाव व इतर तपशील तपासून घ्यावेत तसेच आवश्यक असल्यास निर्धारित कालावधीत दावे किंवा हरकती दाखल कराव्यात.मतदार याद्यांच्या विशेष सखोल पुनरीक्षणाचा सुधारित कार्यक्रम उपजिल्हा निवडणूक अधिकारी, गडचिरोली राहुल जाधव यांनी कळविला आहे.

• सुधारित कार्यक्रम एका दृष्टिक्षेपात👇

– मतदान केंद्रांचे सुसूत्रीकरण/पुनर्रचना–२४ ऑगस्ट २०२६

– प्रारूप मतदार याद्यांची प्रसिद्धी–३१ ऑगस्ट २०२६

– दावे व हरकती दाखल करण्याचा कालावधी–३१ ऑगस्ट ते ३० सप्टेंबर २०२६

– नोटीस टप्पा तसेच दावे व हरकती निकाली काढणे –३१ ऑगस्ट ते २९ ऑक्टोंबर २०२६

– अंतिम मतदार याद्यांची प्रसिद्धी– ४ नोव्हेंबर २०२६