धक्कादायक..! आश्रमशाळेतील १४ वर्षीय विद्यार्थिनीने ओढणीच्या साहाय्याने गळफास लावून केली आत्महत्या..

कुरखेडा(गडचिरोली):-गडचिरोली जिल्ह्याच्या कुरखेडा तालुक्यातील सोनसरी येथील शासकीय माध्यमिक आश्रमशाळेत इयत्ता आठवीत शिकणाऱ्या एका १४ वर्षीय विद्यार्थिनीने आश्रमशाळेच्या वसतीगृहातील तिसऱ्या मजल्यावरील खोलीतील पंख्याला ओढणी बांधून गळफास लावून आत्महत्या केल्याची घटना काल सोमवारी सायंकाळी साडे पाच  वाजताच्या सुमारास घडली.राणू कृष्णा हलामी वय १४ वर्षे,रा.मोहगाव, ता.कुरखेडा,जि.गडचिरोली असे गळफास घेऊन आत्महत्या केलेल्या मुलीचे नाव असून तिने संतापाच्या भरात टोकाचे पाऊल उचलल्याची प्राथमिक माहिती समोर आली आहे.

माहितीनुसार,राणू ही सोनसरी येथील शासकीय आदिवासी आश्रमशाळेत राहून आठव्या वर्गात शिक्षण घेत होती.काल सोमवारी आश्रम शाळेत पालक सभा असल्याने तिचे पालक आश्रमशाळेत गेले होते. त्याचवेळेस राणू ही पालकांना भेटली व आरमोरी येथील दुर्गोत्सव पाहण्याचा आग्रह केला. मात्र,पालकांनी तिला समजावून सांगत काही पैसे दिले.ते तिने फाडून टाकले व मला घेऊन गेले नाही,तर ती जीवाचे बरेवाईट करेन म्हणून पालकांना म्हणाली.दरम्यान,पालक गावी जाण्यासाठी निघाले असता तिचा संताप अनावर झाला आणि आश्रमशाळेच्या वसतीगृहातील तिसऱ्या मजल्यावरील आपल्या खोलीत जात दार बंद केले आणि पंख्याला ओढणीच्या साहाय्याने गळफास घेत आत्महत्या केली.सदर प्रकारची माहिती होताच आश्रमशाळेतील प्रशासनाने तात्काळ पोलिसांना पाचारण केले.घटनेचे गांभीर्य लक्षात घेता कुरखेडा पोलीस ठाण्याचे ठाणेदार अजय जगताप पथकासह घटनास्थळी दाखल झाले.दरम्यान,पोलिसांनी मृतदेह खाली उतरवत पंचनामा केला व उत्तरीय तपासणीसाठी कुरखेडा उपजिल्हा रुग्णालयात पाठवला.पुढील तपास कुरखेडा पोलीस प्रशासन करीत आहे. विद्यार्थिनीने आत्महत्या केल्याच्या घटनेने जिल्ह्यातील आश्रमशाळांमधील विद्यार्थ्यांची सुरक्षा आणि त्यांची काळजी यांबाबत चिंता व्यक्त केली जात आहे.