देसाईगंज नगराध्यक्ष पदासाठी वनिता नाकतोडेंचे नाव फ्रंट पेजवर..

देसाईगंज (गडचिरोली):-नगरपरिषद व नगरपंचायतीच्या निवडणुक प्रक्रियेचा कार्यक्रम जाहीर होताच अनेकजण मैदानात उतरल्याचे दिसून येत आहे. दोन्ही स्थानिक स्वराज्य संस्थांच्या उमेदवारी अर्ज भरण्याच्या प्रक्रियेस काल,सोमवार १० नोव्हेंबरपासून सुरुवात झाली आहे.अश्यातच पक्षांतर्गत तिकीट मिळावी,यासाठी अनेकजण आटापिटा करतांना दिसून येतात.सर्वांनाच पक्षांकडून तिकीट जाहीर केली जाऊ शकत नसल्याने काहीजण ऐन निवडणुकीच्या तोंडावर दुसरीकडे उडी घेऊन आपले अस्तित्व कायम करण्याचा प्रयत्न करीत आहेत.सध्याच्या निवडणुकांमध्ये नगराध्यक्ष पद हे थेट जनतेमधून निवडण्यात येणार आहे. त्यातच देसाईगंज नगर परिषदेचे नगराध्यक्ष पद हे ओबीसी महिलेसाठी राखीव असल्याने अनेकजण कणखर उमेदवारांचा शोध घेऊ लागलेत.पण,उमेदवारी द्यायची तर कुणाला?असा पेच अनेक पक्षांना पडू लागला आहे.यातच सामाजिक कार्यात सक्रिय आणि लोकसंपर्कात रुजलेले व्यक्तिमत्त्व असणाऱ्या देसाईगंज शहरातील वनिता नाकतोडे यांचे नाव थेट नगराध्यक्ष पदाच्या उमेदवारीकरीता पुढे येऊ लागले आहे.वनिता नाकतोडे या गेल्या अनेक वर्षांपासून समाजकार्यात अग्रेसर असून विशेषतः महिला सक्षमीकरण,शिक्षण आणि स्वच्छता अभियानांमध्ये त्यांनी उल्लेखनीय योगदान दिले आहे.त्यांच्या प्रामाणिक आणि जनसंपर्कशील स्वभावामुळे नागरिकांमध्ये त्यांची चांगली प्रतिमा असून स्थानिक नागरिकांकडून या नव्या इच्छुक उमेदवारास देसाईगंज शहरात मोठा पाठिंबा मिळत असल्याचे चित्र आहे.देसाईगंज नगर परिषदेतील आगामी निवडणूक विकास,सुविधा आणि पारदर्शक प्रशासन या मुद्यांवर लढली जाणार असल्याचे दिसते.वनिता नाकतोडे यांच्यासारख्या नव्या आणि कार्यक्षम उमेदवारीमुळे या निवडणुकीत नवे समीकरण घडू शकते,असा अंदाज वर्तविण्यात येत आहे.माहितीनुसार,अनेक सामाजिक संघटना आणि युवक मंडळांनी त्यांच्या इच्छुक उमेदवारीचे स्वागत करत पुढील वाटचालीस शुभेच्छा दिल्या आहेत.