कालच तक्रार झाली अन् आजच अडकले जाळ्यात..! – लाच प्रकरणी ग्रामसेवक व रोजगार सेवकास रंगेहाथ अटक..

जळगाव :-गोर-गरीबांसह सर्वसामान्य नागरिकांना  हक्काचे घर मिळावे,यासाठी शासन स्तरावरून आर्थिक सहाय्य म्हणून घरकुल बांधकामासाठी दीड लाख रुपये दिले जातात.एवढ्या तुटपुंज्या रकमेत घर बांधकाम होत नसतांनाही काहीजण सर्वसामान्य नागरिकांच्या हक्काच्या रकमेवर नजर ठेवून पैश्याची मागणी करीत असतात.त्यामुळे अश्यांना अद्दल घडावी,यासाठी लाच लुचपत प्रतिबंधक विभागाच्या वतीने दणका दिला जातो आहे.अश्यातही काहीजण आपल्या सवियी सोडण्यास तयार नसल्याचा प्रकार आज,मंगळवार २४ जून रोजी जळगाव जिल्ह्याच्या भडगाव तालुक्यातील मांडकी येथे उघडकीस आला आहे.विशेष म्हणजे,ग्रामसेवक आणि रोजगार सेवकाने काल,सोमवार २३ जून रोजी तक्रारदारास सहा हजार रुपयांची मागणी केली.त्यानुसार तक्रारदाराने कालच तक्रार केली आणि आज,मंगळवार २४ जून रोजी पडताळणीसह तडजोडीनंतर पाच हजार रुपयांची लाच स्वीकारण्याची तयारी दर्शविणाऱ्या ग्रामसेवक आणि रोजगार सेवकाला पंचासमक्ष लाच स्वीकारतांना रंगेहाथ अटक करण्यात आल्याने दोघांनीही विचार केला नसेल की,आपला ‘चट मंगणी पट ब्याह’ होणार म्हणून.प्रकरणी भडगाव तालुक्याच्या मांडकी आणि अंतुरली बुद्रुक येथील ग्रामसेवक सोनिराम धनराज शिरसाठ वय ४७ वर्षे व रोजगार सेवक जितेंद्र लक्ष्मण चौधरी वय ३८ वर्षे या दोघांनाही लाच लुचपत प्रतिबंधक विभागाने रंगेहाथ अटक केली आहे.

तक्रारदाराला शासनाच्या घरकुल योजनेचा दुसऱ्या हप्त्याचा लाभ मंजूर झाल्याने दुसरा हप्ता आणि नमुना आठ मिळावा यासाठी तक्रारदाराने ग्रामसेवक व रोजगार सेवकाची भेट घेत घेतली.भेट घेताच दोघांनीही सहा हजार रुपये द्यावे लागतील,असे सांगितले.तक्रारदारास लाच देण्याची इच्छा नसल्याने त्याने काल,सोमवारी लाच लुचपत प्रतिबंधक विभागाकडे तक्रार दाखल केली.त्यानुसार तक्रार प्राप्त होताच आज मंगळवारी पडताळणी केली असता, दोन्ही आरोपींनी पंचासमक्ष तडजोडीनंतर पाच हजार रुपयांची लाच स्वीकारण्याची तयारी दर्शवली. त्यानुसार सापळा रचून आरोपींना पंचासमक्ष लाच स्वीकारतांना रंगेहाथ अटक करण्यात आली असून दोन्ही आरोपींविरुद्ध पाचोरा पोलीस ठाण्यात गुन्हा नोंदवण्यात आला आहे.सदरची कारवाई पोलिस उपअधीक्षक योगेश ठाकूर यांच्या मार्गदर्शनाखाली सापळा अधिकारी पोलीस निरीक्षक नेहा सूर्यवंशी (नंदुरबार) व तपास अधिकारी पोलीस निरीक्षक नेत्रा जाधव (जळगाव सापळा पथक),पोलीस उपनिरीक्षक दिनेश सिंग पाटील,विलास पाटील,पोलीस नाईक हेमंत पाटील व सुभाष पावरा यांनी पार पाडली.