औद्योगिक प्रशिक्षण संस्थांतील तासिका तत्वावरील शिल्प निदेशक होणार नियमित..

मुंबई :-राज्यातील विविध औद्योगिक प्रशिक्षण संस्थांमध्ये ५ वर्षांहून अधिक काळ तासिका तत्त्वावर

काम केलेल्या शिल्प निदेशकांची परीक्षा घेऊन उत्तीर्ण कर्मचाऱ्यांना नियमित करण्याचे लेखी निर्देश कौशल्य विकास,रोजगार,उद्योजकता आणि नाविन्यता मंत्री मंगल प्रभात लोढा यांनी व्यवसाय शिक्षण व प्रशिक्षण संचालकांना दिले आहेत.माजी मंत्री शोभाताई फडणवीस यांनी तासिका निदेशकांना नियमित करण्याबाबत लोढा यांना पत्र पाठवून विनंती केली होती.यानंतर संबंधित अधिकाऱ्यांशी चर्चा करून लोढा यांनी योग्य कार्यवाहीचे निर्देश दिले आहेत. अखिल भारतीय राष्ट्रीय शैक्षिक महासंघाने या विषयावर लोढा यांची भेट घेतली होती.अनेक औद्योगिक प्रशिक्षण संस्थांमध्ये निदेशकांच्या बऱ्याच जागा रिक्त आहेत.त्यामुळे तासिका तत्वावर कार्यरत कर्मचाऱ्यांची परीक्षा घेऊन त्यांना नियमित करावे, अशी मागणी महासंघाने केली होती.