आर्थिक फायद्यासाठी रूम उपलब्ध करून देणाऱ्या हॉटेल मालकासह महिला रिसेप्शनिस्टवर गुन्हा दाखल.. -अल्पवयीन मुलगी गर्भवती प्रकरण..

नागपूर :-सोशल मीडियाच्या इंस्टाग्रामवर बहरून आलेल्या प्रेमाचा अखेर पोलीस ठाण्यात शेवट झाला. १५ वर्षीय अल्पवयीन मुलीची वर्षभरापूर्वी अनिकेत डहाके वय २४ वर्षे,रा.आंतरगाव,ता.समुद्रपूर,जि.वर्धा याच्या सोबत इंस्टाग्रामवर ओळख झाली.चॅटिंगमुळे दोघेही एकमेकांच्या जवळ आले.त्याने तिला विश्वासात घेत भिवापूर शहरात बोलावले आणि शहरातील अर्णव गोल्ड ओयो हॉटेलमध्ये तिच्याशी वारंवार शरीरसंबंध प्रस्थापित केले.यात पीडिता गर्भवती राहिल्याने प्रकरण पोलिसांत पोहचले. प्रकरणी भिवापूर पोलिसांनी विविध कलमान्वये आरोपी तरुणावर गुन्हा दाखल करून आरोपीस अटक केली.प्रकरणाचा तपास भिवापूर पोलिस ठाण्याचे ठाणेदार जयप्रकाश निर्मल यांच्या मार्गदर्शनाखाली सुरू असतांनाच तपासाला एक धक्कादायक वळण मिळाले.आरोपी तरुणाने पीडितेला ८ सप्टेंबर,१९ सप्टेंबर आणि ६ नोव्हेंबर २०२५ अशा विविध तारखांना अर्णव गोल्ड ओयो हॉटेलमध्ये नेल्यानंतर व्यवस्थापनाने कायदेशीर प्रक्रियेला बगल दिली व नियमबाह्यरीत्या रूम उपलब्ध करून देण्यात आली.विशेष म्हणजे,अल्पवयीन पीडितेच्या ओळखपत्राची कोणतीही खातरजमा न करता वारंवार रूम उपलब्ध करून दिल्याने व बालकांचे लैंगिक अपराधांपासून संरक्षण कायदा २०१२ च्या कलम १७ अन्वये,गुन्ह्यात साहाय्य केल्याप्रकरणी पोलिसांनी हॉटेल मालकासह महिला रिसेप्शनिस्टवर गुन्हा दाखल केला आहे.भूपेंद्र बलवंत सोने रा.दिघोरी,नागपूर असे हॉटेल मालकाचे नाव आहे,तर माधुरी शेंडे वय ३६ वर्षे, रा.भिवापूर असे रिसेप्शनिस्टचे नाव असून या दोघांवर गुन्हा दाखल करण्यात आला आहे.