आता नागपुरात होणार महिलांसाठी राज्यातील पहिली एमआयडीसी…

नागपूर :-नागपूर जिल्ह्यातील रामटेक लोकसभा मतदारसंघात कन्हान येथे महिलांसाठी राज्यातील पहिली एमआयडीसी उभारण्यात येणार आहे.दोन दिवसांत मुख्यमंत्री एकनाथ शिंदे याबाबत निर्णय घेतील आणि अधिसूचना जारी होईल.यासोबतच हिंगणा,बुटीबोरीत आता जागा नसल्याने आमडी परिसरात नवी सुसज्ज एमआयडीसी उभारली जाणार असल्याची माहिती उद्योगमंत्री उदय सामंत यांनी दिली.

नागपुरातील कार्यक्रमात उद्योजकांच्या उपस्थितीत लाडकी बहीण योजनेचेही सादरीकरण झाले.यानंतर मंत्री उदय सामंत यांनी माध्यमांशी संवाद साधला.ते म्हणाले,आम्ही पुराव्यानिशी राज्यात किती परकीय गुंतवणूक आली,किती उद्योग सुरू झाले,किती रोजगारांची निर्मिती झाली,याची माहिती देत आहोत. लाडकी बहीण या योजनेतून ४६ हजार कोटी रुपये महिलांना मिळणार असून,शेवटी ही रक्कम गुंतवणूक, विविध वस्तू खरेदीसह बाजारातच येणार आहे.

राज्यातील सर्वच उद्योगांची उलाढाल वाढण्यास मदत होणार आहे.यामुळेच यात या योजनेचा समावेश केला.कुठलेही राजकारण नाही; असेही सामंत म्हणाले.

उद्योगात महिलांचा सहभाग वाढावा,महिला उद्योजक तयार व्हावेत,महिलांना उद्योगात काम मिळावे, रोजगाराच्या संधी तयार व्हाव्यात,यासाठी महिलांसाठी एमआयडीसी उभारण्याचा निर्णय सरकारने घेतला आहे.राज्यातील महिलांसाठीची ही पहिली एमआयडीसी असणार आहे.मुख्यमंत्री एकनाथ शिंदे या संदर्भातील निर्णय घेतील.दोन दिवसांत अधिसूचना जाहीर होईल; असे सामंत यांनी सांगितले.