अवैध दारू विक्रीसह नागरिकांना दमदाटी करणे महिलेला पडले महागात… -सहा महिन्यांसाठी तडीपार..

नागपूर :-कामठी शहरातील रामगड परिसरात अवैधरीत्या दारूविक्री करणे तसेच नागरिकांना दमदाटी करीत मारहाण करणाऱ्या गुन्हेगार महिलेला नागपूर शहर पोलिस उपायुक्त निकेतन कदम यांच्या आदेशान्वये सहा महिन्यांसाठी नागपूर शहर व जिल्ह्यातून हद्दपार करण्यात आले.तिला भंडारा जिल्ह्यात सोडण्यात आले आहे.

नलिनी ऊर्फ सोनी वय २८ वर्षे,रा.विकुत्तबाबा नगर,अनाज गोदामजवळ,रामगड,कामठी असे तडीपार करण्यात आलेल्या गन्हेगार महिलेचे नाव आहे.ती काही वर्षांपासून कामठी शहरातील रामगड भागात अवैध दारूविक्री करते.ती नागरिकांना दमदाटी करण्यासोबतच मारहाणदेखील करते. त्यामुळे नागरिकांमध्ये भीतीचे वातावरण निर्माण झाले होते.तिच्या विरोधात सन २०१९ पासून पोलिसांत अनेक तक्रारी प्राप्त झाल्या आहेत.मध्यंतरी तिच्या विरोधात पोलिसांनी प्रतिबंधात्मक कारवाई केली तर अधूनमधून अटकही केली.

वारंवार सूचना देऊनही तिच्या वर्तनात बदल होत नसल्याने कामठी (नवीन) चे ठाणेदार प्रमोद पोरे यांनी शहरातील कायदा व सुव्यवस्था कायम राहण्यासाठी तिला तडीपार करण्याचा प्रस्ताव पोलिस उपायुक्त निकेतन कदम यांच्याकडे सादर केला.कदम यांनी मंजुरी देताच पोलिसांनी तिला शिताफीने ताब्यात घेत तिला सुनंदा अशोक मेश्राम वय ५० वर्षे, रा.मुजबी, ता.भंडारा,जि.भंडारा नामक नातेवाइकाकडे सोडण्यात आले.या काळात तिला नजीकच्या पोलिस ठाण्यात हजेरी लावण्याच्या सूचना दिल्या आहेत.ही कारवाई हेडकॉन्स्टेबल देवेंद्र सारवे,दीप्ती मोटघरे, दिनेश पांडे यांनी पार पाडली.