उद्रेक न्युज वृत्त
उमरेड(नागपूर) :- मागील चार दिवसांपासून उमरेड तालुक्यातील उदासा-हेवती शिवारात असलेल्या कालव्यामध्ये वाघोबा ये-जा करीत असल्याची माहिती गावकऱ्यांना होती.अशातच पुन्हा काल,शनिवारी सायंकाळी ४ वाजताच्या सुमारास कालव्याच्या पाइपलाइनमध्ये वाघोबा दडून बसला असल्याची वार्ता वाऱ्यासारखी पसरली.
उमरेड येथून अंदाजे १० किमी अंतरावर हेवती रोडलगत राजेंद्र तिडके यांची शेती आहे.या शेतशिवारातील कालव्याच्या पाइपलाइनमध्ये वाघोबा दिसला.वाघ पाइपलाइनमध्ये असल्याची बोंबाबोंब सुरू होताच सोशल मीडिया सक्रिय झाला.हेवती, उदासा,मकरधोकडा,उमरेड,वेकोली येथून शेकडो नागरिक ‘ऑन दि स्पॉट’ पोहोचले.वनविभागाला माहिती मिळताच अधिकारी,कर्मचाऱ्यांनीही घटनास्थळ गाठले.पोलिस ताफाही पोहोचला. परिसरातील नागरिकांची गर्दी उसळली होती.
हेवती-उदासा या गावालगतच मकरधोकडा कालवा आहे.या कालव्याच्या पाइपलाइनमध्ये वाघ मुक्काम करीत असल्याची बाब गावकऱ्यांना कळली.शिवाय मागील काही दिवसांपासून वासरू आणि अन्य जनावरांवर वाघाने हल्ला केला होता.शुक्रवारी गिरजा उरकुडे या महिलेच्या गायीवर वाघाने हल्ला करीत जखमी केले.शेतात जनावरे चराईसाठी नेले असताना ही घटना घडली.या संपूर्ण घटनाक्रमामुळे उदासा, हेवती परिसरात वाघाची दहशत पसरली आहे. वाघ कालव्याच्या पाइपलाइनमध्ये असल्याने तो जखमी अवस्थेत आहे किंवा कसा? याबाबत वनविभाग चाचपणी करीत आहे.
