उद्रेक न्युज वृत्त
उमरेड(नागपूर) :- मकरधोकडा कालव्याच्या पाइपलाइनमध्ये दडून बसलेल्या वाघावर सहा ट्रॅप कॅमेऱ्यांची नजर आहे.उमरेड तालुक्यातील उदासा-हेवती शिवारात शनिवारी दुपारी ४ वाजेपासून कालव्याच्या पाइपलाइनमध्ये वाघ ठाण मांडून बसला. त्याला बघण्यासाठी तोबा गर्दी उसळली. वनविभागाने तातडीने चोवीस तास ६ ते ७ कर्मचाऱ्यांची चमू या ठिकाणी कर्तव्यावर ठेवली आहे.
पाइपलाइमध्ये असलेला वाघ हा दोन ते अडीच वर्षांचा नर असावा, असा अंदाज वर्तविला जात आहे. शिवाय, उमरेड-कन्हांडला-पवनी अभयारण्यातून भटकंती करीत हा वाघ या परिसरात आला असावा, असेही बोलले जात आहे. ट्रॅप कॅमेरे लावण्यात आले असले तरी अद्याप वाघ कॅमेऱ्यासमोर दिसून आलेला नाही. आमनदी वळणाचा हा परिसर असून, सभोवताल झाडाझुडपांचा वेढा आहे. यामुळे अडचण निर्माण होत आहे. साधारणतः दीड वर्षानंतर बछडे शिकार करायला शिकतात. यापूर्वी उदासा शिवारातील शेतात जनावरांना जखमी केल्याच्या घटना उघडकीस आलेल्या आहेत.वाघ जखमी आहे की नाही,कोणत्या अवस्थेत आहे, अद्याप ओळख व्हायची असून,वनविभागाची करडी नजर तसेच सहा ट्रॅप कॅमेऱ्यांच्या माध्यमातून लक्ष ठेवून आहेत.
