अखेर पोत्यात सापडलेल्या मृतदेहाची ओळख पटली..

गोंदिया :-जिल्ह्याच्या सालेकसा तालुक्यातील दशरथटोला(बाम्हणी)परिसरात शुक्रवार १९ सप्टेंबरच्या सायंकाळी सात वाजताच्या सुमारास पोत्यात सडलेले मानवी शरीर आढळल्याने एकच खळबळ उडाली होती. प्रकरणी सालेकसा पोलिस ठाण्यात आकस्मिक मृत्यूची नोंद करण्यात आली होती.देवेंद्र लक्ष्मण नागपुरे वय ३३ वर्षे,रा.पठाणटोला-बाम्हणी हे नहरटोला येथे श्राद्ध भोजन करून परत येत असतांना त्यांना दुकानामागील नहरजवळ दुर्गंधी आल्याने त्यांनी चौकशी केली.धन्नू कुदऱ्या राऊत यांच्या शेताजवळ रस्त्याच्या कडेला एक पोते दिसले.ते उघडून पाहिल्यावर आत मानवी कवटी आणि बाजूला शरीराचे सडलेले अवशेष असल्याचे दिसून आले.बहुतेक हे पोते कुत्र्यांनी ओढून आणल्याचा संशय व्यक्त करण्यात आला होता.घटनेची माहिती मिळताच पोलिसांनी घटनास्थळी धाव घेत पंचनामा करून मृतदेह ताब्यात घेतला आणि पुढील चौकशी पोलिस निरीक्षक भूषण बुराडे यांच्या मार्गदर्शनात सहाय्यक पोलिस निरीक्षक किशोर मावस्कर यांनी सुरू केली होती.अश्यातच आता पोत्यामध्ये कुजलेल्या अवस्थेत आढळलेल्या मृतदेहाची ओळख पटलेली आहे.सदरचा मृतदेह शुभम वाहने वय २६ वर्षे,रा.दैतबर्रा, जि.बालाघाट,मध्य प्रदेश याचा असून तो स्पंदना मायक्रो फायनान्स कंपनीत कर्ज वसुलीचे काम करत होता.४ सप्टेंबर रोजी तो वसुलीसाठी सालेकसा येथे आला होता. त्यानंतर तो बेपत्ता झाल्याची तक्रार त्याच्या कुटुंबीयांनी सालेकसा पोलिस ठाण्यात केली होती.पोलिसांनी तातडीने शुभमच्या कुटुंबीयांना संपर्क साधून याबाबत माहिती दिली.या घटनेचे गांभीर्य  लक्षात घेता,सालेकसा पोलिसांनी अज्ञात व्यक्ती विरोधात खुनाचा गुन्हा दाखल केला असून पुढील तपास सुरू केला आहे.शुभमच्या मृत्यूमागील कारणे आणि त्याचा संबंध त्याच्या कामाशी आहे का?प्रगंगी त्याचा कुणाशी वाद होता का? त्यादिशेने पोलिसांकडून तपास सुरू आहे.