मागणी केली १० लाखांची अन् घेतले ८० हजार रुपये… – खंडणी प्रकरणी पत्रकारास अटक…

नागपूर :-विरोधातील बातमी प्रकाशित न करण्यासाठी खंडणी मागणारा दैनिक भास्करचा शहर संपादक सुनील हजारी वय ४४ वर्षे,रा.गणेशपेठ याला ८० हजार रुपये घेताना पोलिसांनी रंगेहाथ अटक केली.हजारी याने एकूण दहा लाखांच्या रकमेची मागणी केली होती.सदर पोलिस ठाण्याच्या पथकाने काल,गुरुवारी ही कारवाई केली.

आरटीओतील एजंट धनराज ऊर्फ टिटू शर्माने वय ५५ वर्षे रा.बाबादीपसिंहनगर यांनी प्रकरणात पोलिसांकडे धाव घेतली होती.शर्मा अनेक वर्षांपासून ग्रामीण आरटीओशी जुळला आहे.काही दिवसांपूर्वी नागपूर ग्रामीण आरटीओमधील एका प्रकरणात तीन अधिकाऱ्यांना निलंबित करण्यात आले असून,या प्रकरणात संबंधित शर्माची काय भूमिका आहे; याबाबत हजारीने वृत्त प्रकाशित केले होते.याच प्रकरणातील बातमी प्रसिद्ध न करण्याच्या बदल्यात आरोपीने संबंधित शर्माला दहा लाखांची मागणी केली होती.मात्र,त्यानंतर सात लाखांत डील झाली.दिनांक- २८ ऑगस्ट रोजी शर्माने त्याला रात्री साडेदहा वाजता मेडिकल चौकाजवळ एक लाखांचा पहिला हप्ता दिला होता.मात्र,त्यानंतर पैसे देण्याची इच्छा नसल्याने शर्माने सदर पोलिस ठाण्यात धाव घेतली.या प्रकरणाची माहिती वरिष्ठ अधिकाऱ्यांना देण्यात आली.उपायुक्त राहुल मदने यांच्या निर्देशांवरून सदर पोलिस ठाण्याच्या पथकाने सापळा रचला.गुरुवारी आरोपी हजारी पुढील एक लाख घेण्यासाठी व्हीसीए  स्टेडियमजवळील आइस्क्रीम पार्लरमध्ये गेला.तेथे शर्माने हजारीला ८० हजार रुपये दिले.बाकीचे २० हजार कुठे गेले? असा सवाल त्याने विचारला असतानाच पोलिसांच्या पथकाने त्याला रंगेहाथ पकडले.हजारीने लगेच पैसे फेकले व ते माझे नाहीत असा आव आणला.मात्र,सीसीटीव्हीत पूर्ण प्रकार कैद झाला होता.रात्री नऊ वाजताच्या सुमारास पोलिसांनी या प्रकरणात भारतीय न्यायसंहितेच्या कलम ३०८ (२) अंतर्गत गुन्हा दाखल केला आहे.आरोपी हजारीला रात्री लॉकअपमध्ये ठेवण्यात आल्याची माहिती पोलिसांनी दिली आहे.आरोपी मोठ्या वर्तमानपत्रात शहर संपादक असल्यामुळे या कारवाईमुळे खळबळ उडाली आहे.याअगोदरदेखील नागपुरातील काही पत्रकारांविरोधात गुन्हे किंवा पोलिस तक्रारी झाल्या आहेत.मात्र,मोठ्या पदावरील पत्रकार रंगेहाथ सापडल्याची ही पहिलीच घटना म्हणावी लागेल.यानंतर पोलिसांवर गुन्हा दाखल न करण्याबाबत काही मोठ्या व्यक्त्तींनी दबाव टाकण्याचा प्रयत्न केला.त्यामुळे गुन्हा दाखल होण्यास विलंब झाला.