लेखी परीक्षेदरम्यान गैरप्रकार करणारे १३ उमेदवार अपात्र घोषित… – तीन पोलीस कर्मचारी निलंबित…

नागपूर :-शहर पोलिस दलाच्या भरती प्रक्रियेंतर्गत झालेल्या लेखी परीक्षेदरम्यान गैरप्रकार करणाऱ्या १३ उमेदवारांना पोलिस आयुक्त रवींद्रकुमार सिंगल यांनी अपात्र घोषित केले आहे.याच प्रकरणात पोलिस आयुक्तांनी एका उपनिरीक्षकासह २ कर्मचाऱ्यांना पूर्वीच निलंबित केले आहे.पोलिस कर्मचाऱ्यांवरील कारवाईनंतर गैरप्रकार करणाऱ्या उमेदवारांवरील कारवाईकडे सर्वांचे लक्ष लागले होते.पोलिस आयुक्त सिंगल यांनी गैरप्रकार करणाऱ्या १३ उमेदवारांना प्रक्रियेतून बाद करण्यात आले आहे.शहर पोलिस दलाकडून शिपाई प्रवर्गातील ३४७ पदे भरण्यासाठी प्रक्रिया सुरू आहे.त्यासाठी एकूण २९९८७ उमेदवारांनी अर्ज दाखल केले आहेत.कोणताही गैरप्रकार होऊ नये; याची काळजी पूर्वीपासूनच घेतली जात आहे.१६०० मीटर धावणे,शॉटपुट आणि पुलअप्ससह प्रत्येक चरणात बायोमेट्रिक पद्धतीने उमेदवारांची हजेरी घेण्यात आली. शारीरिक चारणीची प्रक्रिया शिस्तबद्ध स्वरूपात पार पडल्यानंतर २८ जुलैला यशवंतराव चव्हाण कॉलेज ऑफ इंजीनियरिंग (वायसीसीई) आणि दत्ता मेघे मेडिकल कॉलेज वानाडोंगरी येथे लेखी परीक्षा घेण्यात आली.त्याच्या आदल्या दिवशीच २७ जुलैला परीक्षा प्रक्रियेसाठी नियुक्त पोलिस अधिकारी आणि कर्मचाऱ्यांची बैठक घेण्यात आली होती.वरिष्ठ अधिकाऱ्यांनी पीरक्षेदरम्यान कोणतीही हयगय केल्यास कारवाईचा इशारा दिला होता.यानंतरही वायसीसीई कॉलेजच्या रूम नं. एससी ३-११ मधील उमेदवारांनी कॉपी केली. एकमेकांना प्रश्नांची उत्तरे विचारण्यासोबतच दुसऱ्याचे पेपर पाहून आपला पेपर सोडविण्यात आला.

परीक्षा केंद्रावर तैनात विशेष शाखेचे पोलिस उपनिरीक्षक संजय चव्हाण,गिट्टीखदान ठाण्याचा हेडकॉस्टेबल संतोष ब्रिजलाल फर्कंडे आणि जरीपटका ठाण्यातील कांस्टेबल सिद्धार्थ भोजराज लोखंडे यांनी गैरप्रकाराबाबत बघ्याची भूमिका घेतली. या प्रकारावरून याच केंद्रातील अन्य उमेदवार नाराज होते.त्यातील एकाने इमेलद्वारे वरिष्ठ अधिकाऱ्यांना तक्रार करीत कारवाईची मागणी केली.पोलिस आयुक्तांनी तक्रार आणि झालेला प्रकार गांभीर्याने घेत अधिकाऱ्यांना केंद्रावरील फुटेज पडताळण्याचे आदेश दिले.त्यातून दोषी कर्मचाऱ्यांची तसेच गैरप्रकार करणाऱ्या उमेदवारांची माहिती समोर आली.