आधी लैंगिक शोषण केले; नंतर लग्न करण्यास नकार.. – आता डॉक्टरचा झाला आरोपी…

गडचिरोली :-सुरुवातीला एका २२ वर्षीय युवतीला जाळ्यात ओढून लग्नाच्या आणाभाका दिल्या व नंतर शारीरिक संबंध प्रस्थापित करून लग्नास नकार देणारा पूर्वी डॉक्टर असलेला आता आरोपी झाला असल्याची खळबळजनक घटना गडचिरोली जिल्ह्यात उघडकीस आली आहे.लैंगिक शोषण प्रकरणी डॉक्टरची पोलीस कोठडीत रवानगी करण्यात आली आहे.कोरची ग्रामीण रुग्णालयातील १०८ रुग्णवाहिकेवर कार्यरत असलेल्या डॉक्टरला बलात्कारप्रकरणी गडचिरोली पोलिसांनी अटक केली आहे.आतिश पंकज सरकार वय २६ वर्षे,रा.कोरची असे आरोपीचे नाव आहे.

प्राप्त माहितीनुसार,आरोपी आतिश सरकार याने पीडित २२ वर्षीय युवतीला लग्नाचे आमिष दाखवून सुरुवातीला तिच्यासोबत शारीरिक संबंध प्रस्थापित केले.पीडित युवतीने त्याला लग्नाबाबत विचारणा केली असता त्याने लग्न करण्यास नकार दिला. युवतीकडील मंडळींनी त्याला समजावण्याचा प्रयत्न केला.मात्र, तो मानण्यास तयार नव्हता.शेवटी पोलिस स्टेशनमध्ये तक्रार दाखल करण्याशिवाय पीडित युवतीकडे पर्याय नव्हता.युवतीने गडचिरोली पोलिस स्टेशनमध्ये तक्रार दाखल केली.तक्रारीवरून आतिशच्या विरोधात गडचिरोली पोलिस स्टेशनमध्ये गुन्हा दाखल करण्यात आला.पोलिसांनी त्याला अटक करून न्यायालयात हजर केले.पहिल्यांदा न्यायालयाने एक दिवसाची पोलिस कोठडी सुनावली.त्यानंतर न्यायालयात हजर केले असता न्यायालयाने त्याला १४ दिवसांची न्यायालयीन कोठडी सुनावली आहे.