उद्रेक न्युज वृत्त
लाखांदूर(भंडारा):-पतसंस्था शाखा प्रबंधक व सोने परीक्षक म्हणून नियुक्त सोनाराने संगनमत करून ५ व्यक्तींकडून नकली सोने गहाण ठेवीत तब्बल ६८.७२ लाख रुपयांचे कर्ज मंजूर करून पतसंस्थेची फसवणूक केल्याचे प्रकरण उघडकीस आले आहे. विरली बु.येथील स्वामी विवेकानंद अकृषक सहकारी पतसंस्थेत गहाण सोने लिलावादरम्यान ही घटना उघडकीस आली.
याप्रकरणी लिलाव अधिकारी म्हणून नियुक्त बारव्हा येथील स्वामी विवेकानंद अकृषक पतसंस्थेचे शाखा प्रबंधक दिनेश विनोद हुकरे यांच्या तक्रारीवरून स्थानिक लाखांदूर पोलिसांनी तालुक्यातील विरली बु. येथील मीनाक्षी कैलास मस्के,ललिता रामकृष्ण मस्के, रामकृष्ण सदाशिव मस्के,लेकराम महादेव मेंढे, सोमेश्वर गुलाब बेदरे आदी ५ कर्जदार इसमांसह पवनी तालुक्यातील लोणारा येथील तत्कालीन शाखा प्रबंधक नरेंद्र श्रावण मेंढे व कैलाश रामकृष्ण मस्के यांच्या विरोधात भारतीय न्याय संहितेच्या विविध कलमांतर्गत फसवणुकीचा गुन्हा दाखल करण्यात आला आहे.
पोलिस सुत्रानुसार,सन २०१८ ते २०२१च्या सुमारास घटनेतील पाचही कर्जदार व्यक्तींनी नियमित अंतराने स्थानिक विरली बु.पतसंस्थेच्या शाखेत ३ हजार ५५५.२४ ग्रॅम सोने गहाण ठेवून लाखो रुपये कर्जाची उचल केली होती.विहीत कालावधीत गहाण ठेवलेल्या सोन्याच्या रकमेचा भरणा न केल्याने पतसंस्था प्रशासनांतर्गत गहाण ठेवलेल्या सोन्याचा लिलाव आयोजित करण्यात आला होता.लिलावावेळी गहाण सोन्याच्या परीक्षणासाठी दुसऱ्या सोनाराची नियुक्ती करण्यात आली होती.परीक्षकाने सोन्याचे परीक्षण केले असता गहाण ठेवलेल्या ३ हजार ५५५.२४ ग्रॅम सोन्यापैकी केवळ २९५.५१ ग्रॅम सोने खरे आढळले.उर्वरित ३ हजार २५९.७३ ग्रॅम सोने नकली असल्याचे उघडकीस आले.या घटनेत लिलाव अधिकारी म्हणून नियुक्त शाखा प्रबंधकांनी विरली बु.येथील पतसंस्थेच्या तत्कालीन सोने परीक्षक व तत्कालीन शाखा प्रबंधक यांनी संगनमत करून नकली सोने गहाण ठेवीत घटनेतील ५ कर्जदार व्यक्तींना तब्बल ६८.७२ लाख रुपयांचे कर्ज मंजूर करून फसवणूक केल्याच्या प्रकार समोर आला.तक्रारीवरून ठाणेदार सचिन पवार यांच्या मार्गदर्शनात घटनेतील ७ आरोपींविरोधात गुन्हा दाखल करण्यात आला आहे.
