उद्रेक न्युज वृत्त
लाखांदूर(भंडारा) :- रोजगार हमी योजने अंतर्गत शेत शिवारात मातीकाम करीत असलेल्या एका मजुराचा मृत्यू झाला.ही घटना काल,१९ मे रोजी सकाळी १० वाजताच्या सुमारास लाखांदूर तालुक्यातील सोनेगाव शेत शिवारात घडली.रामचंद्र सखाराम ब्राह्मणकर वय ५६ वर्षे असे मृत मजुराचे नाव आहे.
लाखांदूर तालुक्यातील सोनेगाव ग्रामपंचायत क्षेत्रात मागील काही दिवसांपासून शासनाच्या मग्रारोहयोच्या अकुशल कामांतर्गत शेतशिवारात मातीकाम सुरू करण्यात आले आहे.या माती कामावर रामचंद्र स्वतःच्या कुटुंबीयांसह नियमित मजूर म्हणून काम करीत आहे.रविवारला रामचंद्र सकाळच्या सुमारास काम करीत असतानाच अचानक रामचंद्रला भोवळ आली व तो जमिनीवर कोसळला.यावेळी रामचंद्रच्या कुटुंबीयांसह शेतशिवारात उपस्थित अन्य मजुरांनी रामचंद्रला उपचारासाठी एका खासगी रुग्णालयात हलविले.डॉक्टरांनी उपचारा पूर्वीच रामचंद्रला मृत घोषित केले.
मजुराचा आकस्मिक मृत्यू झाल्याची माहिती स्थानिक सोनेगाव ग्रामपंचायतचे सरपंच नरेश कठाणे, ग्रामसेवक लांजेवार,रोजगार सेवक नाहोकर यांच्यासह लाखांदूर पंचायत समितीच्या रोजगार हमी योजना विभागाच्या काही अधिकारी कर्मचाऱ्यांना होताच सर्वांनी मृतकाच्या घरी भेट दिली.यावेळी कुटुंबीयांना मजुराच्या मृतदेहाचे शवविच्छेदन करण्याबाबत सांगितले.मात्र, कुटुंबीयांनी शवविच्छेदन करण्याला विरोध केला.परिणामी,मृत्यूचे कारण कळले नाही.
