दोन चिमुकल्या मुलींवर अल्पवयीन मुलाचा अत्याचार..

गोंदिया :-जिल्ह्याच्या अर्जुनी-मोरगाव तालुक्यात दोन अल्पवयीन चिमुकल्या मुलींवर अत्याचार झाल्याची अत्यंत गंभीर आणि धक्कादायक घटना समोर आली आहे.या प्रकरणी अर्जुनी-मोरगाव पोलिसांनी तात्काळ कारवाई करत एका १६ वर्षीय अल्पवयीन विधीसंघर्ष बालकाविरूध्द स्थानिक पोलिस स्टेशन येथे अपराध क्रमांक-२२६/२०२६ कलम ६४ (२)(आय),६४(२)(एम), ६५(२),३५१ (३)भारतीय न्याय संहिता,सहकलम ४,६,८ बाल वैज्ञानिक अत्याचार संरक्षण कायदा २०१२ अंतर्गत गुन्हा दाखल करून त्याला गोंदियाच्या बाल न्यायालयात नेण्यात आले.मीडिया रिपोर्टनुसार,सदरची घटना अर्जुनी-मोरगाव तालुक्याच्या बोंडगाव देवी येथे २३ मे २०२६ रोजी सकाळी अकरा वाजेच्या सुमारास  घडली.विशेष म्हणजे,घराशेजारी राहणाऱ्या अल्पवयीन मुलीने घडलेल्या प्रकरणाची माहिती तिच्या आईला सांगितल्याने सदर प्रकरणास वाचा फुटली आणि प्रकरण पोलिसांत पोहचले.त्यानुसार,२४ मे रोजी पोलिसांत तक्रार दाखल करण्यात आली.१६ वर्षीय अल्पवयीन मुलाने घराशेजारी राहणाऱ्या दोन अल्पवयीन मुलींना खेळण्याच्या बहाण्याने घरी बोलावले व अत्याचार केला.संबंधित मुलीपैकी एकीचे वय अवघे ६ वर्षे ९ महिने,तर दुसरीचे वय १० वर्षे असून घटनेनंतर मुलींना कोणालाही माहिती दिल्यास जीवे मारण्याची धमकी देण्यात आल्याचाही आरोप आहे.यातील एक मुलगी ही आरोपीच्या नात्यातील असल्याचेही समोर आले आहे.त्यामुळे प्रकरण अधिक गंभीर मानले जात आहे.गावकऱ्यांनी या घटनेविरोधात संताप व्यक्त केला असून कठोर कारवाईची मागणी केली आहे.