उपराजधानीत मध्य भारतातील सर्वात उंच भगवान बजरंगबलीच्या मूर्तीचे काम अंतिम टप्प्यात..

नागपूर :-महाराष्ट्र राज्याची उपराजधानी असलेल्या नागपुरात मध्य भारतातील सर्वात उंच भगवान बजरंगबलीची(हनुमान)विराट आणि भव्य-दिव्य अशी मूर्ती तयार करण्यात येत असून नागपूरच्या कोराडी परिसरातील महालक्ष्मी जगदंबा मंदिराशेजारी उभारली जात असलेल्या या भव्य बजरंगबलीच्या मूर्तीचे काम आता अंतिम टप्प्यात आले आहे.जवळपास जून महिन्यापर्यंत या संपूर्ण प्रकल्पाचे काम पूर्ण होण्याची शक्यता आहे.त्यानंतर,भव्य लोकार्पण सोहळा पार पाडण्यात येईल,असे नागपूर जिल्ह्याचे पालकमंत्री तथा राज्याचे महसूल मंत्री चंद्रशेखर बावनकुळे यांनी स्पष्ट केले.मध्य भारतातील सर्वात उंच आणि आकर्षक हनुमान मूर्ती म्हणून या प्रकल्पाकडे पाहिले जात आहे.या संपूर्ण संरचनेची उंची फाउंडेशनसह तब्बल २०६ फूट असून,प्रत्यक्ष मूर्तीची उंची १६२ फूट आहे.अत्याधुनिक तंत्रज्ञानाचा वापर करून ही मूर्ती उभारण्यात आली आहे. या मूर्तीतील सर्वात मोठे आकर्षण म्हणजे भगवान हनुमानांच्या हातातील ७४ फूट उंचीची विशाल गदा. जगातील सर्वात मोठ्या गदांमध्ये तिची गणना होणार असून,तिची नोंद ‘गिनीज बुक ऑफ वर्ल्ड रेकॉर्ड’मध्ये करण्याची प्रक्रियाही सुरू झाली आहे.या गदेची भव्यता पाहण्यासाठी भाविक आणि पर्यटकांमध्ये मोठी उत्सुकता निर्माण झाली आहे.या संपूर्ण प्रकल्पामध्ये आधुनिक तंत्रज्ञानाचा प्रभावी वापर करण्यात आला आहे.मूर्तीवर विशेष धातूचा लेप देण्यात आला असून त्यामुळे ती अधिक आकर्षक,चमकदार आणि टिकाऊ बनली आहे. रात्रीच्या वेळी विशेष लाईटिंग आणि प्रोजेक्शन मॅपिंगच्या साहाय्याने ही मूर्ती विविध रूपांमध्ये पाहायला मिळणार आहे.एवढेच नाही तर प्रोजेक्शनच्या माध्यमातून हनुमान चालीसाचं सादरीकरणही करण्यात येणार आहे.त्यामुळे भाविकांना धार्मिक अनुभवासोबतच आधुनिक तंत्रज्ञानाचाही अनोखा अनुभव घेता येणार आहे.