सबळ पुराव्याअभावी आरोपीची निर्दोष सुटका.. – कुरखेडा तालुक्यातील बलात्कार प्रकरण

गडचिरोली :-जिल्ह्याच्या कुरखेडा तालुक्यात २००९ मध्ये घडलेल्या एका बलात्कार प्रकरणातील आरोपीची सबळ पुराव्याअभावी निर्दोष सुटका करण्यात आली आहे.सदरचा निर्णय हा गडचिरोली जिल्हा व सत्र न्यायालयाचे न्यायाधीश अनिरुद्ध टिकले यांनी बचाव पक्षाचा युक्तीवाद ग्राह्य धरून आरोपी महारु मडावी रा.चिचटोला,ता.कुरखेडा,जि.गडचिरोली याची बलात्काराच्या खटल्यातून निर्दोष सुटका करण्याचा आदेश पारीत केला आहे.प्रकरणाचा निकाल हा काल बुधवारी लागला.

चिचटोला येथील महारु मडावी याच्यावर बलात्काराचा गुन्हा ९ डिसेंबर २००९ रोजी दाखल करण्यात आला होता.कुरखेडा तालुक्याच्या एका गावातील महिला गावानजीकच्या बोडीवर कपडे धुण्यासाठी गेली असता महारु मडावी हा आपल्या शेतातून अंतर्वस्त्र घालून बोडीवर गेला आणि त्यानंतर त्याने पीडित महिलेचा गळा दाबून तिच्या इच्छेविरुद्ध शारीरिक संबंध प्रस्थापित केल्याची घटना ३ ऑक्टोंबर २००९ रोजी दुपारी ३ वाजताच्या सुमारास घडल्याची पिडीत महिलेने दिलेल्या तक्रारीत म्हटले होते.त्यानुसार,कुरखेडा पोलिसांनी गुन्हा नोंदवून तपास सुरु केला होता व आरोपी महारु मडावी यास अटक करुन ९ डिसेंबर २००९ रोजी न्यायालयात दोषारोपपत्र दाखल केले.दरम्यानच्या काळात न्यायालयाने आरोपीचा जामीन मंजूर केला खरी,पण न्यायालयाच्या सुनावणीत तो वारंवार अनुपस्थित राहिल्याने न्यायालयाने त्याच्याविरुद्ध अजामीनपात्र वॉरंट काढल्याने पोलिसांनी महारु मडावीस २०२४ मध्ये अटक करुन कारागृहात रवानगी केली.तेव्हापासून आरोपी महारु मडावी हा कारागृहात होता.त्यानंतर,आरोपीने मोफत वकील मिळावा यासाठी जिल्हा विधी सेवा प्राधिकरणाकडे विनंती केली.जिल्हा विधी सेवा प्राधिकरणाने आरोपीच्या विनंतीवरून ॲड.संजय भट यांनी मोफत विधी सेवा पुरवून बाजू मांडली.प्रकरणात सरकारी पक्षाच्या वकिलांनी आरोपीविरुद्ध न्यायालयात सबळ पुरावा सादर केला नसल्याने प्रकरणाचा निकाल आरोपीच्या बाजूने लागला आणि महारु मडावीची निर्दोष सुटका करण्यात आली.